ఇండో-పాక్ వార్ వస్తుందా? రెండు దేశాలూ ఆటం బాంబులు విసురుకుని…!?!? వామ్మో!నిద్ర పట్టట్లేదు😴😴😴


ఫిబ్రవరి 14 నుంచీ ఈ రోజు సాయంత్రం వరకు కంటి మీద కునుకు లేదు.

ఎక్కడ మన వాళ్లు పాక్ మీద సర్జికల్ స్ట్రైకులు చేసేస్తారో…

ఎక్కడ ఇండో-పాక్ వార్ వచ్చి పడుతుందో….

ఎక్కడ రెండుదేశాలూ ఆటంబాంబులు విసురుకుని సర్వనాశనం చేసేసుకుంటాయో….

ఒక్కో జెట్టూ 576 కోట్లు లెక్కన వేలకోట్ల ఫైనాన్షియల్‌ రిస్కూ, మరోపక్క అదో కుంభకోణం అని జనం అనుకుంటే ఎదురయ్యే పొలిటికల్ రిస్కూ వున్నా గుండెల్ని 56 అంగుళాల రాళ్ళు చేసుకుని కొన్న రఫాలే ఫైటర్ జెట్లు వాయుసేనలో చేరకుండానే ఎక్కడ యుద్ధం వచ్చి పడిపోతుందో ….

ఎక్కడ ఇమ్రాన్ ఖాన్ రాంగోపాల వర్మ ట్వీట్లు – – –

varma1

– – – తట్టుకోలేక ఆయన బుర్ర మీద తన క్రికెట్ బాల్ తో దీటుగా స్పందించేస్తాడో …

ఇలాంటి టెన్షన్లు వణికిస్తుంటే నిద్రెలా పడుతుంది నాలాంటి సామాన్యుడికి?

కానీ ఇవాళ నిద్ర వచ్చేస్తోంది, యుద్ధప్రాతిపదికన. నిజం! వార్ ఫియర్స్ గాలికెగిరిపోయాయ్!! జస్ట్ రెండు యూట్యూబ్ వీడియోలు చూడగానే ….

అవి ఇవీ 👇😇

మొదటిది, “మోడీ! పాకిస్తాన్-తో యుద్ధం వద్దు. నేను మాట్లాడతా వాళ్ళతో,” అంటున్న K.A.పాల్‌ గారి అభయహస్తం.

రెండోది, “యుద్ధం ఆపటానికి పాకిస్తాన్ వెళ్తున్నా,” అంటున్న శాంతిదూత ఆశ్వాసన.

ఇంకేం భయం లేదు. ట్రంపుతో సహా ప్రపంచం అంతా – including me – హాయిగా ఫానేసుకుని, దుప్పటి కప్పుకుని నిద్దరోవచ్చు. మీరూ నిద్దరోండి. Good night 🖐😊

😴😴😴😴😴😴😴😴😴😴

ఆ అమ్మాయి మూగప్రశ్నలకి కొవ్వొత్తులూ, వీరాలాపాలూ సెలబ్రిటీ-తొడచరుపులూ ఎన్నికల సంవత్సరపు ఎక్స్-గ్రేషియోల కంటే అర్ధవంతమైన జవాబులున్నాయా?


photo courtesy : Eenadu

కన్నతండ్రికి కడసారి కన్నీటి సెల్యూట్ చేస్తున్న ఆ 👆 అమ్మాయి కళ్ళలో కనిపించే ప్రశ్నల్ని ప్రపంచం పసిగట్టిందా? కనీసం ఊహించిందా?
ఆ ప్రశ్నలకి –
కొవ్వొత్తుల ప్రదర్శనలూ
నాయకుల వీరాలాపాలూ
సెలబ్రిటీల తొడ చరుపులూ
ఎన్నికల సంవత్సరపు ఎక్స్-గ్రేషియోల —
కంటే అర్ధవంతమైన జవాబు ఇవ్వగలదా ?

ఇప్పుడే సోషల్-మీడియాలో వైరల్ అవుతున్న ఒక వీడియోలో ఒక వీరవనిత ఉపన్యాసం చూశా. ఆవిడ లేవనెత్తిన పాయింట్ ఏంటంటే – ఆటల్లో కప్పులు, మెడల్స్ గెల్చుకొచ్చిన క్రీడాకారులకి ఉద్యోగాలూ, కోట్ల కోట్ల రివార్డులూ, బ్రాండ్-అంబాసిడర్ షిప్పులూ, ఇళ్ళూ, స్థలాలూ… అందించే ప్రభుత్వాలు అమర జవాన్లకి ఇస్తున్నదేంటి అని .
అవును. ప్రభుత్వం సమాధానం చెప్పాల్సిన విషయమే ఇది. కానీ ప్రభుత్వం కంటే ముందు ప్రజలు ఆలోచించాల్సిన, స్పందించాల్సిన విషయం కూడా. ప్రజలు స్పందించకుండా ప్రభుత్వం యాక్షన్ తీసుకునే విషయం కాదు కూడా. ఎందుకంటే –
డ్యూటీలో ప్రాణాలు కోల్పోయిన జవాన్ చేసింది మహాత్యాగం అని ఒక పక్క కన్నీరు కారుస్తూ, వాళ్ల కుటుంబాలకి సహాయం చేసే విషయంలో సర్వీస్ రూల్స్ దాటని / దాటలేని అశక్తత / అసమర్ధత/ ఆలోచనా రాహిత్యం ప్రభుత్వాలదే. అదే సెలబ్రిటీల దగ్గరకొచ్చేసరికి రూలింగ్ పార్టీ ప్రచార కాంక్ష + పబ్లిక్ క్రేజు + బడా బడా కంపెనీల అడ్వార్టైజ్మెంట్ బడ్జెట్లు అన్నీ కలిసొస్తాయి. కానీ ఈ పరిస్థితికి బాధ్యత ప్రజలదే. కొవ్వొత్తులతో ప్రదర్శన అయ్యాక ఎవరైనా ఎక్కడైనా వాళ్ళ ఎంపీలని పార్లమెంటులో డిస్కస్ చెయ్యమని, ఇప్పటివరకూ ఎందుకు చేయలేదనీ నిలదీస్తున్నారా? లేదు కదా !! లేదు అనడానికి ఒకటే ఒక్క ఆధారం, పార్లమెంట్ చర్చలూ, రికార్డులే.

Military men’s patriotism/sacrifice are rewarded by employment contract.

Celebrities’ rewards are covered by –
Rulers’ hunger for publicity +
Public Craze +
Advertisement budgets of big businesses

Finally,
People do not press their MPs to discuss it in Parliament.

ఈ చర్చంతా ఒక ఎత్తూ, అసలీ చర్చలకి చోటిచ్చే సమస్యల మూలాలు వెతకడం మరో ఎత్తు. మూలచ్ఛేదం చెయ్యకుండా కబుర్లు చెప్తూ కూచునే నాయకత్వాలు – అవి దేశానివి కావచ్చు, ప్రపంచానివి కావచ్చు – అందరూ చేస్తున్నది వ్యాపారం తప్ప ఇంకోటి కాదు. ఈ సమస్యకి పరిష్కారం వుంది, దొరుకుతుంది అనుకోడం అత్యాశే, దురాశే. మనిషి మైండు యొక్క డిజైన్ అలాంటిది. ప్చ్!! ఆ డిజైన్ మార్చుకోవాల్సింది మనిషే. ఆ మార్పుకి నాందిగా, మారాల్సిన మానవజాతిలో భాగంగా 2015లో ఇలాంటి సందర్భంలోనే, తండ్రిని కోల్పోయి కుములుతున్న ఆ 👇 చిన్నారిని చూసి రాసుకున్న వాక్యాలనే మళ్ళీ గుర్తు చేసుకుంటున్నా 👇

ఈ దుఃఖానికి కారణమెవరు?ఈ గాయానికి బాధ్యులు ఎవరు?
మనుషుల మధ్యన మంటలు పెట్టే మతమా?మతం పేరుతో నాటకమాడే రాజకీయమా?
ఈ దుఃఖానికి కారణమెవరు?ఈ గాయానికి బాధ్యులు ఎవరు?
చేతికొచ్చిన తలరాతలు రాసే దేవుళ్ళా? దేవుడి పేరిట ద్వేషం నేర్పే మనుషులా?
ఈ దుఃఖానికి కారణమెవరు?ఈ గాయానికి బాధ్యులు ఎవరు?
అమాయకంగా ప్రాణాలొడ్డే దేశభక్తులా? అధికారంకై ఎత్తులు వేసే దేశభోక్తలా?
ఈ దుఃఖానికి కారణమెవరు?ఈ గాయానికి బాధ్యులు ఎవరు?
జిహాద్ ముసుగులో మూఢులు చేసే రక్తపాతమా? చేతకానితనపు ఆయుధం పట్టిన శాంతికపోతమా?
ఈ దుఃఖానికి కారణమెవరు? ఈ గాయానికి బాధ్యులు ఎవరు?
విభజించి పాలించే సామ్రాజ్యవాద స్వార్ధపరత్వమా? వ్యాపారానికి ఆదర్శాల్ని బలిచేసే బడుగుదేశాల నిస్సహాయత్వమా?
కులమతవర్గ ప్రాంతవర్ణజాతిబేధాలను పాటించనివి తీరని దుఃఖాలూ, మానని గాయాలే, మనుషులు కాదు !!
సరిహద్దులు, అంతస్తులు, ఆచారాలకి అతీతమైనవి వ్యాపారం, దురహంకారం, అధికార దాహం అంతే, మానవత్వం కాదు !!
మనుషులందర్నీ ఒకటి చేసేది మంచి మనసు, కానీ దేవుళ్ళని విడగొట్టేది మనసు చచ్చిన మతం
తెలుసుకో పిచ్చితల్లీ, ఏడవకు మళ్ళీ మళ్ళీ
గాయాలు, దుఃఖాలు, మతమౌఢ్యాలు, సిద్ధాంతాల్లో తేడాలు, మనుషుల మధ్య గోడలు, అవి రాజకీయాల పంచ ప్రాణాలు
రాజకీయం, దురహంకారం, వ్యాపారం, అధికారం, అతివ్యామోహం ఇవి స్వార్ధానికి పంచశిరస్సులు
రాజకీయాల పంచప్రాణాలు పోతేనే నీ దుఃఖానికి అంతు
స్వార్ధం పంచశిరస్సులు తెగిపడితేనే ఈ గాయానికి మందు
స్వార్ధం, రాజకీయం ఉన్నన్నాళ్ళూ సరిహద్దులకటూఇటూ నీ దుఃఖం పంచుకునే అమాయకులుంటూనే ఉంటారు.

తెలుసుకో పిచ్చితల్లీ, ఏడవకు మళ్ళీ మళ్ళీ
నాన్న చేసిన త్యాగం వ్యర్ధం కాదు, “మనిషి”ని మనిషిగా మార్చే ప్రేమై ఆ శౌర్యం, ధైర్యం మళ్ళీ అవతరిస్తాయి.

తెలుసుకో పిచ్చితల్లీ, ఏడవకు మళ్ళీ మళ్ళీ

🌹 🌹 🌹 సర్వే జనాః స్సుఖినో భవంతు 🌹 🌹 🌹

న్యూమరాలజీ = నారదాలజీ


నర  – నారా

ఇంద్ర –  చంద్ర 

పై పదాల్లో కామన్  అక్షరాలేవేంటి?

న – ర – ద  —> ఆ ‘న’ ని కొంచెం సాగదీస్తే ?  

నా-ర-ద  = నారద 

నారదుల వారి మెయిన్  డ్యూటీ ఏంటీ? కలహాలు పెట్టుట. 

నారదులవారు వున్నచోట కలహాలు కాపురము చేయును. 

కధని ఇంకొంచెం సాగదీద్దాం ….

న – ర – ద –> ఆ ‘న’ని మైనస్ చేసేసి అక్కడ ‘బు’ పెడితే ?

బు-ర-ద 

బురద = మట్టి+నీళ్లు 

మట్టి పక్కన ఒక ✊🏼 

నీళ్ల పక్కన ఒక 🥛

తగిలిస్తే ఆ ఈక్వేషనేవన్నా మారుతుందా? మారదు.

మారకపోగా బురద సరైన పాళ్ళలో తయారౌతుంది. కదా !!!

చూద్దాం! 2019లో న్యూమరాలజీ ఏవన్నా మారుతుందేమో !!

ఇంతే సంగతులు. బై4నౌ 

😁😁😁

🌳వన🌕🐦విహారం🌵 – ఆ రోదసీపక్షి, ఈ పుడమిపిట్ట Bird-Celestial zooms above, the Bird-Terrestrial looms below


మనం ఏ హడావిడీ లేకుండా పౌర్ణమి అని పిలుచుకునే నిండు పున్నమికి అమేరికన్లు ముద్దుగా సూపర్-మూన్, బ్లడ్-మూన్,…లాంటి పేర్లు పెట్టారు. సూపర్ మూన్ పేరు బానే ఉంటుంది కానీ బ్లడ్-మూన్ అంటేనే ఒక రకంగా ఉంటుంది.

రక్త చంద్రుడు !! అని తెలుగులో అనుకుంటే రాంగోపాల్ వర్మ సినిమా టైటిల్లా వుండి ఎర్రటి ఆకాశం, అందులో గబ్బిలాలు ఎగురుతూ, మధ్యలో కాలు తెగి రక్తం కారుతున్న ఒంటరి ఒంటెలా …. అబ్బో !! తల్చుకుంటే కడుపులో దేవుతోంది.

తెలుగు మనసు ఆర్జీవీ-మార్క్ చంద్రుణ్ణి చూస్తే దూరంగా పారిపోతుంది. నిజానికి శ్రీశ్రీగారి –

ఒక రాత్రి :

గగనమంత నిండి, పొగలాగు క్రమ్మి-

బహుళ పంచమి జ్యోత్స్న భయపెట్టు నన్ను!

ఆకాశపుటెడారి నంతటా, ఆకట !

ఈ రేయి రేగింది ఇసుక తూఫాను!

గాలిలో కనరాని గడుసు దయ్యాలు

భూదివముల మధ్య ఈదుతున్నాయి!

నోరెత్తి, హోరెత్తి నొగులు సాగరము!

కరి కళేబరములా కదలదు కొండ !

ఆకాశపుటెడారిలో కాళ్ళు తెగిన

ఒంటరి ఒంటెలాగుంది జాబిల్లి !

విశ్వమంతా నిండి , వెలిబూదివోలె –

భయపెట్టే బహుళ పంచమి జ్యోత్స్న అన్నా బెదిరిపోతుంది తెలుగ్గుండెకాయి.

ఆర్జీవీ-మార్కు బ్లడ్-మూన్లు, శ్రీశ్రీ మార్కు కాళ్ళు తెగిన ఒంటెలు తెలుగు ఒంటికి పడవు. మిట్ట మధ్యాన్నం పూట వెన్నెల కురిపించి అరవైయ్యేళ్ల పైగా లాహిరి లాహిరి అనిపించి, ఉయ్యాలలూగించిన మార్కస్ బార్ట్లే-మార్కు మాయాబజార్ చందమామకే మన వోటు.

అందుకే మొన్న 20న, 21న రాత్రి పదింటికి సూపర్ మూన్ ఫోటోలు తీద్దామని బైల్దేరినప్పుడు రక్తం, గబ్బిలం, కాళ్ళు తెగిన ఒంటె … ఇలాంటివేం గుర్తుకి రాలేదు.

నల్లటి మబ్బుల మధ్య ఎగురుతున్న తెల్లటి కొంగలా అనిపించాడు జాబిల్లి. అదుగో అలా –

dscn2989

dscn3007

నికాన్’వాడు P900 మోడల్లో మూన్-షాట్ అనిచెప్పి ఒక సెట్టింగ్ ఇచ్చాడు. అది పెట్టి తీస్తే ఇదుగో చందమామయ్యగారి నిజరూప దర్శనం ఇలా అయ్యింది.

అర్ధరాత్రి హత్య చేసి, మొహంమీద పడిన రక్తం తుడుచుకోకుండానే పారిపోతున్న ఆర్జీవీ చంద్రుడు, ఆకాశపు ఎడారిలో కాళ్ళు తెగి పడున్న ఒంటరి ఒంటెలాంటి శ్రీశ్రీ చంద్రుడు అయిపు లేరు.

ఓ రెండున్నర లక్షల మైళ్ళ దూరంలో ఆకాశంలో అడ్డంగా దొర్లుతున్న పుచ్చకాయలాంటి మరో లోకం కనిపించింది. తెల్లగా మెరుస్తున్న ప్రదేశాలన్నీ మిలమిల్లాడుతున్న నగరాల్లా, పుచ్చకాయ చారల్లా వున్న ఆ గీతలన్నీ విమాన మార్గాల్లా, నల్లటి ప్రాంతాలు చంద్రలోకపు సముద్రాల్లా కనిపిస్తూ మళ్ళీ మార్కస్-బార్ట్లే మాయాబజార్లోకి తీసుకెళ్లిపోయాయి.

supermoon2

చిన్నప్పుడు నండూరి రామ్మోహన్రావుగారి “విశ్వరూపం”లో చూసిన చందమామని నా స్వహస్తాలతో ఆకాశంలోంచి దింపినంత సంతోషం. ఆ సంతోషంలోంచి తేరుకుని భూలోకంలో – అంటే మా కాలవ్వొడ్డున – ఏం జరుగుతోందో చూద్దామని కెమెరా అటు తిప్పాను.

dscn2899

కొంగజాతి ఆకలి గురించి నాకు పెద్ద ఐడియా లేదు, కానీ మా కాలవ్వొడ్డున ప్రతీరోజూ కనిపించే ఈ బకశ్రేష్ఠుడు/శ్రేష్టురాలి ఆకలి మాత్రం అమోఘం. రాత్రీపగలూ తేడా లేకుండా ఎప్పుడూ ఇక్కడే ఉంటుంది. ఇప్పుడూ ఉంది. కెమెరా ఫ్లాష్’కి బెదిరి కొంచెం దూరంగా వెళ్లి వాలింది.

నేల మీద ఈ నీటిపక్షిని చూస్తుంటే ఇప్పుడు చంద్రన్న** సుదూరాకాశంలో రెక్కలు లేకుండా ఎగురుతున్న పక్షిలా అనిపించాడు. (** చంద్రన్న అనగానే ప్రస్తుతం ఏ పార్టీతోనూ పొత్తులేని (?) ఆంధ్ర చంద్రన్నలా అనే అర్ధం ధ్వనిస్తోందేమో🤔… బాబోయ్! నాకసలా ఆలోచనే రాలేదండోయ్!😯🙏)  ఆ అనిపించిన దానికి ఫలితంగా ఆ రోదసీపక్షిని, ఈ పుడమిపిట్టని అదుగో అలా కలపాలనిపించింది. కలిపా –

birds celestial n terrestrial

As the bird-celestial zooms above, the bird-terrestrial looms below అంటూ పెద్ద కాప్షన్ కూడా పెట్టా. (నా మిడి మిడి ఆంగ్ల పరిజ్ఞానానికి అదే ఎక్కువ.)

ఇంతకీ ఆ బకశ్రేష్ఠుడు / బకశ్రేష్ఠ యొక్క ఆంగ్లనామం Striated Heron. ఆసియాలో చాలా దేశాల్లో కనిపిస్తుంది. అదృష్టవశాత్తూ ఈ కొంగ ప్రమాదంలో పడిన జీవ జాతుల జాబితాలో ఇంకా చేరలేదు. ఏనిమల్ బిహేవియర్ మీద ఆసక్తి వున్న వారికి దీని బిహేవియర్ నిజంగా మెదడుకి మేతే. దాని గురించి వచ్చే వనవిహారంలో. బై4నౌ.

“Hinduism comes closest to being a nature religion. Rivers, rocks, trees, plants, animals, and birds all play their part, both in mythology and everyday worship. This harmony is most evident in remote places like this, and I hope it does not lose its unique character in the ruthless urban advance.”

Ruskin Bond, Rain in the Mountains: Notes from the Himalayas

రైతుని పట్టిన 🐊రుణమకరాన్ని🐊 వదిలించవే మకర సంక్రాంతీ!!🙏🙏




అందరికీ
సంక్రాంతి శుభాకాంక్షలు ముఖ్యంగా రైతన్నలకీ, నేతన్నలకీ. రైతుల పంటలకి మంచి ధరలు పలికి, జనం (మనం) కొనుక్కునే బట్టల్లో ఓ 25% చేనేత బట్టలే కొనుక్కునీ వాళ్ళ సంక్రాంతిలో కొత్త కాంతి నింపాలని కోరుకుంటూ … వాళ్ళ ఋణాలు
(పార్టీలకి అతీతంగా) 100% మాఫీ అయిపోయి మళ్ళీ వాళ్ళు అప్పులు చెయ్యాల్సిన అవసరం రాకూడదని ఆశ (దురాశా?) పడుతూ …


🐄🐂🐃 🌾🌾🌴🌴🌳🌳🌿🌿🎋🎋🐄🐂🐃

🐝🌻వనవిహారం 🌵🐛- ప్రతిక్షణం చూసిన సినిమానే చూడ్డానికి దేవుడేమన్నా తెలుగు సినిమా మేకరా?


ముళ్ళపూడి వెంకటరమణగారి అప్పుల అప్పారావు చెప్పిన ఫేమస్  డైలాగుల్లో ఒకటి – “సూర్యుడెందుకు ఉదయిస్తాడు? నదులెందుకు ప్రవహిస్తాయి? వెన్నెలెందుకు కాస్తుంది? అందుకే  అప్పారావు అప్పులు చేస్తాడు,” అనేది. రాజబాబు నోటఎంచక్కా పలికిన యూనివర్సల్ ఫాక్ట్ . 

అప్పులు చెయ్యడం అనేది ప్రకృతి సహజధర్మాల్లో ఒకటని అర్ధం చేసుకోడానికి ఇంతకంటే సహజమైన సులభమైన వివరణ ఎక్కడా లేదేమో? కానీ ప్రకృతి ఒడిలో మైమరిచిపోయే క్షణాల్లో మనిషికి, అందులోనూ తెలుగు మనిషికి  ‘కలాపోసన’ ఆటోమేటిగ్గా వచ్చేసే అసంకల్పిత ప్రతీకార చర్య. అప్పారావుకి అప్పులు చెయ్యడం ఎంత సహజమో అంత సహజమైన విషయం అది. ఆ కలాపోసనలో భాగంగా భలే భలే అందాలూ సృష్టించావూ, ఇలా మురిపించావూ అంటూ దేవుణ్ణి గుర్తు చేసుకుంటాం, అసలెందుకు ఇవన్నీ ఇలా ఇంతందంగా… అంటూ భావావేశం ప్రకటించుకుంటాం. దాంతోపాటు కాస్త భావకవిత్వం ప్రవహించే ప్రమాదం కూడా లేకపోలేదు. ఇంచుమించు అలాంటి అసంకల్పిత ప్రతీకార చర్యల్ని ప్రేరేపించినా కొన్ని దృశ్యాలు నిన్న చూశాను, మా Sungei Buloh mangroves
(మడ అడవి) లో. ఆ చూడ్డంలో   సూర్యుణ్ణి రోజూ ఉదయించమని తొందరపెట్టే అర్జెంట్లూ  వారెంట్లూ  ఏంటో తెలిసిందనిపించింది.  
అప్పారావు అప్పులకి, నదులు ప్రవహించడానికీ, వెన్నెల కాయడానికీ ,… కూడా ఇలాంటివే ఏవో కారణాలుండచ్చు. అవేంటో తర్వాత చూద్దాం.  ముందు పెత్యక్ష నారాయుడి పొద్దు పొడుపు హడావిడి ఏంటో, ఎందుకో చూద్దాం. 


ప్రభాత కిరణాలతో  అలల ని స్పృశించాలనే ఆరాటంతో … 

ఇబిరిత (Hornbill) పక్షి రెక్కల  అంచుల గుండా  ప్రసరించి  కొత్త కాంతులు  సంతరించుకోవాలనీ ...

రంగు రంగుల  తూనీగల  రెక్కలపై నర్తించలే ని వెలుగులు వెలుగులా ? అనీ ... 

అలలపైనా , గాలి తెరలపైనా  జరిగే తెల్ల కొంగల బాలె  (ballet)కి తొలికిరణాల వేదిక నిర్మించాలనీ  …. 

ప్రత్యక్ష నారాయుడు ప్రతిరోజూ పరిగెత్తుకొస్తాడనిపించింది. 

His own mornings are new surprises to God అంటాడు విశ్వకవి Stray Birds అనే పద్య సంకలనంలో. అవును కదా? ఈ చరాచర సృష్టి అంతటినీ సృష్టించడానికి సృష్టికర్తకి ఇంతకంటే కారణం కావాలా? జరామరణ చక్రాన్నీ, అందులో పడి కొట్టుమిట్టాడడా నికి మనుషుల్నీ సృష్టించి ప్రతిక్షణం చూసిన సినిమానే చూడ్డానికి దేవుడేమన్నా తెలుగు సినిమా మేకరా?


	

☕కాఫీత్వ☕ – పిబరే🙏రామరసం // పిబరే☕ఫిల్టర్-కాఫీ


Musicoffee

☝ అది జస్ట్ కాఫీ  మూడ్‌లోకి వచ్చేందుకు,

ఇది👇 నేను ఫ్రెష్‌గా కలిపిన కాఫీ ఎంజాయ్ చెయ్యడానికీ 😎, go ahead !!

ఈ మధ్య వైకుంఠంలో స్వామివారితో బాతాఖానీ కొడుతూ కాఫీ పుచ్చుకుని  చాలా రోజులు – రోజులు కాదు, ఒక ఏడాదిన్నర – అయింది. స్వామివారేమనుకుంటున్నారో, ఇప్పుడు కప్పు పట్టుకుని వెళ్తే, “ఏం  ఇన్నాళ్ళకి గుర్తొచ్చానా,” అంటారో అనీ, అంటే ఏం  చెప్పాలో తెలీకా కొంచెం ఊగిసలాడినా , స్వామివారి  దగ్గర మనకి మొహమాటం ఏంటీ? ఒకవేళ ఆయన చురకలేమన్నా అంటించినా నేను కొత్తగా కొనుక్కున్న ఫ్రెంచ్-ప్రెస్ ఫిల్టర్లో  తీసిన డికాక్షన్నీ, పాలకడలి పాలనీ, ఆయన వేసిన చురకలతో వేడి చేసి, తీపికి కాసిని పోతనగారి పద్యాలో, రామదాసు  కీర్తనలో కలిపి ఒక కప్పు కాఫీ స్వామివారి చేతికందిస్తే అంతా సద్దుకుంటుందని, ధైర్యం చేసి –

ఆలోచనల చుట్టలు చుట్టుకుని

అలజడుల పడగలతో బుసలు కొడుతూ

అం’తరంగా’లపై తేలియాడుతున్న

మనోశేషుడిపై కూర్చునో, పడుకునో వుండే స్వామివారి వైపుకి దారి తీశాను. లాస్టియర్ బ్రెజిల్లో కొనుక్కున్న రెండు బుల్లి కాఫీ కప్పుల్తో సహా.

నేను వెళ్ళేప్పటికి స్వామివారి పాదాల దగ్గర రెండు చేతులూ జోడించి కళ్ళలో ఆనందభాష్పాలు  నిండి ఆయన్నే చూస్తూ హనుమంతులవారున్నారు. స్వామివారు ఒక చేత్తో  హనుమ వీపు నిమురుతున్నారు.

నా రాక చూసి స్వామి , ” ఏమిరా! నా అడ్రెస్ మర్చిపోయినట్టున్నావ్?,” అన్నారు. అఫ్కోర్స్ నవ్వుతూనే. “అమ్మయ్య! స్వామికి కోపమేం లేదనమాట, హస్కు మొదలెట్టచ్చు,” అనుకున్నా. మాట కలుపుతూ, “స్వామీ! హనుమంతులవారున్నారని తెలీక రెండు కప్పులే  తెచ్చాను. ఇంకో కప్పు … , పోనీలెండి మీరిద్దరూ కాఫీ తాగాక నేను….,” అంటుండగా హనుమ నావైపు కళ్ళు చికిలించి చూశాడు. నా నోరు మూతపడింది. హనుమ, “రామయ్యా! వీడెవడయ్యా? పానకంలో పుడకలాగా? కాఫీ ఏంటి? తాగడమేంటి?,” అన్నాడు.

“వీడొకరకం భక్తుడు హనుమా! నవవిధభక్తిమార్గాల్లో  ఏదీ వీడికి సూటవ్వదు. అందుకే కాఫీత్వం అని పదోరకం భక్తి మార్గాన్ని ఫాలో అవుతున్నాడు”

“అసలు కాఫీ అంటే ఏమిటి స్వామీ!” హనుమ అడిగాడు.

స్వామి జవాబిచ్చేలోపు నేనందుకుని,”కపీశ్వరా ! కాఫీ గురించి తెలియాలంటే భూలోకంలో కాఫీ గురించి వున్న ఒక సూక్తి వినండి.  అది   Coffee is to the body what the Word of the Lord is to the soul – మీ భాషలో చెప్పాలంటే మీకు రాములవారి గొంతు విన్నప్పుడు ఎలాంటి  ఫీలింగ్ వస్తుందో మా నరులకి కలియుగంలో కాఫీ ఫ్లేవర్ తగిలినా, కాఫీ చుక్క నాలిక మీద పడినా  అలా వుంటుందన్నమాట,” అన్చెప్పి  నా తెలివికి నేనే మురిసిపోబోతుండగా, రామబంటు , “మూర్ఖుడా! కృతయుగం నుంచీ కలియుగం వరకూ ఆల్ టైమ్ ఫేవరిట్ రామనామం ఒక్కటే. సోమరసం కంటే రామరసం గొప్పదని దేవతలు కూడా చెప్తుంటే ఇదేదో కాఫీచుక్క, కాఫీ కిక్కు అంటూ కారుకూతలు కూస్తున్నావా? ఎందుకో స్వామివారు నిన్ను ఉపేక్షిస్తున్నారు కనక వదిలేస్తున్నా! లేకపోతేనా ….!!”  అంటూ గుడ్లురిమాడు. హడిలిపోయాను. వెంటనే చేతులో వున్న రెండు కప్పుల్లో నాలుగు చెంచాల పాల సముద్రము, 16 చెంచాల కాఫీరసమూ కలిపి హనుమ కళ్ళ ముందుంచాను. “పిబరే రామరసం, రస..నే, పిబరే రామరసం …” అంటూ కీర్తన అందుకున్నా. మనసులో మాత్రం స్వామివారి వైపు తిరిగి, “నీ వ్యూహాత్మక మౌనం వీడి హనుమని శాంతింపచెయ్యి స్వామీ!” అని ప్రార్ధించ సాగాను. హనుమ చూపులకి కాఫీ మరిగి కమ్మటి కాఫీ ఆవిరులు భగవంతుణ్ణీ, నాలోని  భక్తుణ్ణీ అనుసంధానం చెయ్యడం మొదలెట్టాయి. ఓరకంట హనుమంతులవార్ని చూశా. లవకుశలో లవకుశుల మీద కోపం వచ్చి యుద్ధానికి దిగినా “రామ సుగుణధామా ..” పాటతో  చల్లబడినట్టు హనుమంతులవారు ఇప్పుడూ చల్లబడుతున్నారు. అది కాఫీ ఫ్లేవర్ వలన కాదు సదాశివ బ్రహ్మేంద్ర  కీర్తన  వలన అని తెలుసుకోలేనంత మూఢత్వం లేదు కనక  పాట  పూర్తి చేసి కిక్కురుమనకుండా కూచున్నా. ఇంతలో స్వామివారు ఓ కప్పు చేతిలోకి తీసుకున్నారు. “హనుమని ఇబ్బంది పెట్టద్దు, ఆ రెండో కప్పు నువ్వు తీసుకో,” అన్నారు స్వామి.

“హనుమా! భూమ్మీద కాఫీ గురించి No one can understand the truth until he drinks of coffee’s frothy goodness” అనే సూక్తి కూడా ప్రచారంలో వుంది. కలియుగంలో కలిగే రకరకాల కన్ఫ్యూజన్లనించి బయటపడడానికి వీడిలాంటివాళ్ళు  కప్పు కాఫీ కలుపుకుని, దాని రుచికీ , సువాసనకీ మనసుకాస్త స్థిమితపడి నిదానంగా ఆలోచిస్తారు. కలియుగ-కన్ఫ్యూజన్లోంచి బయటపడినా, పడకపోయినా కనీసం అది ఎందుకొచ్చిందో అర్ధం చేసుకుంటారు. నరులు truth తెలుసుకోవాలనుకోవడం, తెలుసుకోవడం, దానికి కట్టుబడి బతకడం ఇవే కదా నేను వాళ్ళ నుంచి ఆశించేది. అంచేత మనమే కాస్త అర్ధం చేసుకోవాలి. ఓ కప్పు కాఫీ తీసుకుంటూ  ఓ  పది నిముషాలు నిదానంగా కూచుని చుట్టూ జరిగేది రేషనలైజ్ చేసుకోడం మనిషికి అలవాటైతే వాడు అనేక అనవసర కన్‌ఫ్యూజన్స్‌లోంచి బయటపడొచ్చూ అని కాఫీత్వ సిద్ధాంతం,” అన్నారు స్వామి.

“ఏంటి స్వామీ, ఆ కన్ఫ్యూజన్లు? తాటకిని, వాలిని చంపే ముందు మీకొచ్చిన కన్‌ఫ్యూజన్‌కంటే,  లంకలో సీతమ్మని వెతుకుతూ నేను పడ్డ కన్ఫ్యూజన్లకంటే, అగ్నిపరీక్షప్పుడు మేమంతా పడిన కన్‌ఫ్యూజన్‌కంటే పెద్దవా?,” ఆంజనేయులవారి అమాయక ప్రశ్న.

“పిచ్చి స్వామీ! ఇప్పుడా టైపు కన్ఫ్యూజన్లు పెట్టుకునేవాళ్ళెక్కడున్నారు? భూలోకానికెళ్ళావంటే నీ గురించి నిన్నే కన్ఫ్యూజన్లో ముంచేస్తారు,” అనుకున్నా. పైకి అన్లేదు.

అనాలా? అంతరంగశాయికి తెలీదా?

ఇంతలో సర్వాంతర్యామి చేతుల్లో మాయాబజార్ సినిమాలో వాడిన ప్రియదర్శిని ప్రత్యక్షం అయింది. అది తెరిచి హనుమ ముందుంచి, “హనుమా! నీ గురించి భూలోకంలో ఇప్పుడు ఏం వివాదం జరుగుతోందో చూస్తావా ?,” అన్నారు. తోకరాయుడి తోక నిటారుగా నిలబడింది. “నా గురించా? చర్చా? నా చుట్టూ ప్రదక్షిణాలూ, దీక్షలు, చాలీసా పారాయణాలూ కాకుండా వివాదాలు కూడానా!?!,” అనే ఆశ్చర్యం, ఆందోళనా ఆ తోకలో కనిపిస్తున్నాయి. ఇంతలో ప్రియదర్శినిలో ఒక టీవీ ఛానెల్ డిబేట్ మొదలైంది. ఇద్దరు ఛోటా  లీడర్లూ, ఒక పండితుడూ, రెండు మతాలకి చెందిన పెద్దలూ, ఒక హేతువాది, ఒక యానిమల్-రైట్స్ అసోసియేషన్ ప్రతినిధి … ఇలా చాలామంది వున్నారు. అందరూ గందరగోళంగా అరుచుకుంటున్నారు. యాంకర్ కి చర్చ జరపడం కంటే వాళ్ళ రణగొణ ధ్వని ఆపడమే పెద్దపనిగా వుంది. హనుమయ్య కళ్ళు చిట్లించి, చెవులు రిక్కించి, తోక నిలబెట్టి జరిగేది చూస్తున్నాడు.

సీన్ ఇక్కడ కట్ చేద్దాం.

……………….   …………………….      ………………   ………………..     ……………………..

అరగంట తర్వాత రామభక్త హనుమాన్ ప్రియదర్శిని మూసేసి స్వామి వైపు చూశాడు. “ఏంటి స్వామీ! ఇదంతా? ఈ చర్చతో పోలిస్తే నేను లంకలో రాక్షసులందరి మధ్యా రావణుడితో చేసిన చర్చ చాలా ప్రశాంతంగా నడిచినట్టు లెక్క. అదలా వుంచండి, వీళ్లంతా రామాయణం చదవరా, లేకపోతే అర్ధం చేసుకోరా స్వామీ? ఒకడు నన్ను బడుగుజాతి వాడంటాడు, ఒకడు నేను ఉట్టి కోతినంటాడు, ఇంకోడేమో  క్షత్రియుణ్ణంటాడు, మరొకడు దేవుణ్ణంటాడు, ఒకళ్ళయితే హనుమంతుడు హిందువు కాదంటాడు, ఆ తరవాత వాడు “ఏంటండీ దేవుళ్ళూ, అవతారాలూ ఇదంతా? అంతా  నాన్సెన్సండీ,” అంటాడు. ఆ పండితుడేమో ఎవరికీ సరిగ్గా చెప్పలేక ఏవో చిలవలూ, పలవలూ, ప్రక్షిప్తాలూ, నిక్షిప్తాలూ.. చెప్తున్నాడు. అసలీ కులాలూ, మతాలూ ఇవన్నీ ఏంటీ? కన్ఫ్యూజనంటే ఈ  గందరగోళమేనా?,” అన్నాడు.

స్వామివారు నవ్వి, “Hanuma! Let’s discuss that over our next cup of coffee☝,” అన్నారు. అని నా వైపు తిరిగారు. “సరే స్వామీ, బై4నౌ, వచ్ఛే టపాకి మూడు కప్పులు తీసుకొస్తా,” అంటూ  అం’తరంగా’ల్లోంచి ఈదుకుంటూ  బాహ్యప్రపంచంలోకి వచ్చేశా🤗.

😃🙏Stay tuned & join me for the next ☕😃

 

 

🕊స్ట్రే-బర్డ్స్🕊 – చిన్న కోట్💁‍♀🤷‍♂💁‍♂🤷‍♀ పేద్ధ డిస్కషనూ


ఒక ఉదయం వాక్‌లో కనిపించిన ఆ దృశ్యం నా కెమెరాకి పని చెప్పింది. ఆ పైన నా స్మార్ట్-ఫోనుకీ పని చెప్పి – “గడ్డి పరకలు నేలతో స్నేహాన్ని కోరుకుంటే చెట్టు ఏకాంతం కోసం ఆకాశంలో వెతుకుతుందిట,” – అనే ఆ రెండు వాక్యాలూ రాయించింది.  

సొంతకవిత్వం కాదు. టాగోర్ తన ఆలోచనల్ని హైకూల్లాంటి చిన్న చిన్న పద్యాలుగా కూర్చి పేర్చిన పుస్తకం, స్ట్రే బర్డ్స్ నుంచి తీసుకున్నా. తీసుకుని, ఆ ఫోటోకి అతికించి మా కాలేజ్ గ్రూపులో గుడ్మాణింగ్ మెసేజిగా పోస్ట్ చేశా, నిన్న. పసుపు, ఎరుపు, ఆకుపచ్చ రంగుల ఆకులు నీలాకాశాన్ని స్పృశిస్తూ టాగోర్ మనసులో వున్నది నిజం అంటున్నట్టున్నాయి కదా!!

వెంటనే ఒక ఫ్రెండు రెస్పాన్స్ వచ్చేసింది  – “అంటే, నువ్వు పెద్దవాడివైపోయాకా ఏకాంతం కోరుకుంటావా?,” అంటూ.  “ఏదో కోట్ బావుంది కదా అని వాడేశాను, గురూ! ఈ  ప్రశ్నతో  ఇప్పుడు పెద్దపనే పెట్టావ్!,” అ(నుకు)న్నా. అన్నానే కానీ ఆలోచించకుండా ఆగగలనా? అం’తరంగాలు’ 🌊ఎగయకుండా🌊 ఆపగలనా? అసలీ ఆలోచన విశ్వకవికి ఎందుకు, ఏ సందర్భంలో మెదిలి ఉంటుందో ఊహించడం మొదలెట్టా. Here👇are my thoughts🤗 —

On a lighter note,

In Tagore’s view grass must be feminine and the tree masculine. That’s why he referred to grass and tree as ‘her’ and ‘his’ respectively. Not because Tagore wants to prove man’s superiority over woman. A man of Tagore’s stature can never think, speak, write or act that way. He saw woman’s gregarious nature in grass and in the tree, he saw man’s aloofness.

On a heavier note,

the attributes of both grass and tree can actually be found within one personality irrespective of the person’s gender. During youth one needs to be worldly and socialize; as the mind keeps maturing, the solitude becomes automatic. One can be in the middle of action with the mind completely detached from the results. 

వాటిని అలాగే గ్రూపులో పోస్ట్ చేసేశా .

దీనికి ఒక స్పందన ఇలా వచ్చింది –

“ఒక గడ్డి పరక తుఫాన్లనీ, వరదల్నీ ఎదుర్కొని తిరిగి కోలుకుంటుంది. అదే ఒక చెట్టుకి సాధ్యం కాదు. తుఫానుని తట్టుకుని నిలబడనైనా నిలబడుతుంది లేదా కూలిపోతుంది. కూలకుండా నిలబడినా ఎంతో కొంత దెబ్బ తినకుండా ఉండదు. అహంకారం చూపించడం తెలియని గడ్డి పరక వరద ఉధృతికి  వినయంగా తలవంచి, వరద తగ్గగానే తిరిగి నిలబడుతుంది. నేను మహావృక్షాన్ని, నేను తలవంచడమేమిటి అన్న అహంకారం ప్రదర్శించే చెట్టు కూలిపోయే ప్రమాదానికి గురౌతుంది. గడ్డిపరకకీ, చెట్టుకీ ఉన్న ఇదే వైరుధ్యం స్త్రీ పురుష స్వభావాల్లోనూ కనిపిస్తుంది. జీవిత సంక్షోభాలని సమర్ధవంతంగా ఎదుర్కొనేందుకు, అనివార్య పరిస్థితులతో రాజీపడి, అనుకూల దృక్పధంతో ముందుకు సాగే సామర్ధ్యం స్త్రీలో ఉన్నంతగా పురుషుడిలో ఉండదు. ఆమెలో సహజంగానే ఎక్కువగా వుండే క్షమాగుణం, సహనం, వినయం, అహంకార రాహిత్యం ఆమెకి అనుకూలించి సహకరిస్తాయి.”

నిజం కదా !!! ఎంత మంచి స్పందన అనిపించింది. 

ఇప్పుడు మరో స్పందన, ఇంకొక గ్రూప్ మెంబర్  నుంచి –

“టాగోర్ స్త్రీ సహజ స్వభావాలైన సున్నితత్వాన్ని, సౌకుమార్యాన్ని గడ్డికి , పురుష సహజాలైన దృఢత్వం, పట్టుదలలని చెట్టుకి ఆపాదించి ఉండచ్చు. కానీ, స్త్రీకానీ, పురుషుడు కానీ అవే స్వభావాలని పట్టుకుని వేళ్లాడాల్సిన పని లేదు. వయసుతో పాటు వైరాగ్యాన్ని పెంచుకోవాలనే  రూలేం లేదు. అందరితో కలివిడిగా ఉంటూ వృద్ధాప్యంలో కూడా ఆనందంగా ఆరోగ్యంగా ఉంటున్న ఆడవాళ్ళని, మగవాళ్ళని కూడా ఎంతోమందిని మనం చూడొచ్చు. ఏకాంతం కోరుకున్నా, నలుగురి సాంగత్యాన్ని కోరుకున్నా అది వ్యక్తిగత ప్రాధాన్యాన్ని బట్టీనే కానీ అది స్త్రీయా, పురుషుడా అనే దానిపై ఆధారపడదు.”

ఇదీ నిజమే. ఈ భావనతోనే  మొదట్లో  రాసిన నా వ్యాఖ్యానంలో రెండు స్వభావాలనీ ఒకే వ్యక్తిత్వంలో చూడొచ్చని రాసాను. అయితే వివరణని కొంచెం పొడిగించాలనే  ఉద్దేశంతో  –

“నిజమే, సరళమైన గడ్డి స్త్రీ స్వభావాన్నీ, దృఢమైన చెట్టు పురుష ప్రకృతినీ ప్రతిబింబించి తీరాలని హార్డ్ అండ్ ఫాస్ట్ రూలేం లేదు కానీ టాగోర్ కాలం నాటికీ ఇప్పటికీ స్త్రీపురుష స్వభావాల విషయం ఎలా వున్నా వారి వారి వాక్స్వాతంత్రంలో,  భావవ్యక్తీకరణలో చాలా తేడా వుంది. మన తాతల, అమ్మమ్మల కాలంలో కేవలం మగజన్మ ఆడ జన్మ కన్నా ఒక మెట్టు ఎక్కువనే నమ్మకం వల్ల కావచ్చు, కుటుంబ పెద్ద అనే స్టేటస్ వల్ల కావచ్చు లేదా  సంస్కృతి-సంస్కారాల ప్రభావంతో అబ్బిన వైరాగ్య భావం వల్ల కావచ్చు మగవాళ్ళు, ముఖ్యంగా తండ్రులు కొంత ముభావంగా, దూరంగా, మితభాషులుగా, ఒక ప్రత్యేక స్థానంలో వుండేవాళ్ళు. మన తల్లితండ్రుల హయాంలో పరిస్థితి మారింది. ఉమ్మడి కుటుంబాలు తగ్గి వ్యష్టి కుటుంబాలు, వాటితోపాటు ఆర్ధిక స్వాతంత్రాలు పెరగడంతో కుటుంబ పెద్దకీ, ఇతర సభ్యులకీ మధ్య దూరం కూడా తగ్గి స్త్రీ-పురుష స్వభావాల్లో అంతరాలు కూడా తగ్గి ఉండచ్చు. మన జెనరేషన్ వచ్చేసరికి ఇంకా మార్పు వచ్చింది,” అన్నాను.

ఇక్కడితో డిస్కషన్ ఆగింది. అందరూ ఆఫీసుల్లో, పనుల్లో పడి  బిజీ అయిపోవడంతో.

ఏ వందేళ్ల కిందటో విశ్వకవి మదిలో రెక్కలు విప్పిన స్ట్రే-బర్డ్స్ మా స్నేహితుల ఆలోచనల ఆకాశంలో ఇలా విహరించడం, మా అం’తరంగాల్ని’ కదిలించి ఆలోచనల్ని రేకెత్తించడం చక్కటి అనుభూతినిచ్చింది. 

🕊🕊🕊🕊🕊🕊🕊🕊🕊🕊🕊🕊🕊🕊🕊🕊🕊🕊🕊🕊🕊🕊🕊🕊



🌳🦌వన🐾విహారం🌾🦋 – రాయలవారి 👑 🐥Kingfisher


ఒకళ్ళు కింగ్ ఆఫ్ గుడ్ టైమ్స్; ఇంకొకరు ఎ కింగ్ హూ మేడ్ టైమ్స్ గుడ్ ఫర్ పీపుల్.
ఇద్దరూ లకుముకిపిట్టకి తమదైన శైలిలో పేరు తెచ్చినవాళ్ళే.
ఈపాటికి ఇదంతా ఎవర్ని గురించో మీకర్ధం అయ్యుంటుంది. కనీసం మొదటి కింగ్, లకుముకిపిట్ట పేరు మీద ఒక ఎయిర్-లైన్స్, ఒక బీరు బ్రాండూ పెట్టిన పెద్దమనిషే అని తెలిసిపోయుంటుంది.  లకుముకిపిట్టలకి తెలుగు సాహిత్యంతో ఏ మాత్రం పరిచయం వుందో మనకి తెలీదుగానీ, ఒకవేళ కాస్త సాహిత్యస్పర్శ వుండి, ఆ స్పర్శ లకుముకిపిట్ట చేత దీపాల పిచ్చయ్య శాస్త్రిగారి చాటుపద్య రత్నాకరం చదివించి వుంటే, దానికి తప్పకుండా –
“ఆడిన మాటకుఁ దప్పెను
గాడిదకొడు” కంచుఁ దిట్టఁగా విని “యయ్యో
వీఁడా నా కొక కొడు” కని
గాడిద యేడిచెఁ గదన్న ఘనసంపన్నా!
అనే పద్యం గుర్తొచ్చి అది కూడా తెగ ఫీలై పోయుంటుంది. (కానీ గాడిదలూ, లకుముకిపిట్టలూ కూడా తెలుగు చదువుకునే, మాట్లాడే పరిస్థితే వుంటే తెలుగుని రక్షించండోయ్ బాబోయ్ అంటూ తెలుగువాళ్ళు ఏడిచే పరిస్థితి ఎందుకొస్తుందీ? రాదు కదా! అది వేరే విషయం).

కింగ్-ఫిషర్‌కి మంచి పేరు తెచ్చిన రాజుగారెవరో కూడా తెలిసిపోయుంటుంది, టపా టైటిల్ చూడగానే. రాయలవార్ని తల్చుకోగానే సమరాన, సాహితీ సమరానా మడమ తిప్పని మహావీరుడు గుర్తొచ్చి తెలుగుండెలు (=తెలుగుగుండెలు) ఉప్పొంగడం వింతేం కాదు. కానీ ఒకవంక ఉర్రూతలూచు కవనాలతో, ఒక వంక వురికించు యుద్ధ భేరీలతో బిజీ బిజీగా వుండే ఆంధ్రభోజుడి ప్రకృతి పరిశీలనా శక్తీ, ఆ ప్రకృతిని లక్ష్మికి ప్రతిరూపంగా చూసిన ఆయన ఆధ్యాత్మిక దృష్టీ రెండూ అద్భుతం అనిపించేలా వ్రాసిన కొన్ని పద్యాలు – గరికపాటివారి ఆముక్తమాల్యద ప్రసంగంలో విని, ఆయన చెప్పిన ఈ పుస్తకంలో  https://ia902708.us.archive.org/18/items/AmuktaMalyada_988/Amuktamalyada_Part01.pdf చూసి తెలుసుకున్నాను – చదివితే ప్రకృతి ప్రేమికుల గుండెలు తెలుగులో ఉప్పొంగడం గారంటీ.

Rayalavari Lakumuki

లకుముకిపిట్టలని వర్ణించిన తీరు ఒక విశేషమైతే, అవి గ్రామాల్లో వుండే బావుల్లో, అదీ వీధిబావుల్లో, చేపల్ని వేటాడుతూ వుంటాయని చెప్పడంలో ఆనాటి ప్రజలు ప్రకృతికి ఎంత దగ్గరగా వుండేవారో తెలుస్తుంది. లక్ష్మీదేవి చేతిలో బంతితో లకుముకిని పోల్చడంతో ఆయన సహజ ప్రకృతికి ఇచ్చిన విలువ ఏమిటో తెలుస్తోంది. లక్ష్మి కరముల నుంచి వస్తున్నది కాబట్టి లకుముకి అయిందేమో అసలు. (లంబోదర లకుమికరా..లో లకుమికరా అంటే లక్ష్మిని ప్రసాదించేవాడు అని అర్ధం(ట). దాన్నే కొంచెం నాకు కావలసినట్టు అర్ధం చేసేసుకున్నా, ఇలా –
లక్ష్మికర పక్షి >>> లకుమికర పిట్ట >>> లకుముకి పిట్ట

వై నాట్?

Lakumuki 3

ఇంతకీ లకుముకిపిట్టల్లో ఓ వంద రకాలుండగా రాయలవారి పద్యంలో అందంగా బందీ అయిన లకుముకి ఏ రకం అయ్యుంటుంది?
నా ఊహ ఈ 👇బుల్లి పిట్ట అని. ఎందుకంటే చాలా రకాలు కేవలం చేపల మీదే కాక కీటకాలు, ఇతర చిన్నజీవులని కూడా వేటాడి బతుకుతాయి. ఇది మాత్రం ఎప్పుడూ నీళ్ళు ఉన్నచోటే కొమ్మల మీదా, బండల మీదా, ఒక్కోసారి నీళ్ళలో ఉన్న చేపని చూస్తూ గాల్లో వున్నచోటే కదలకుండా ఎగురుతూ (hovering) కనిపిస్తుంది.

Lakumuki 4

మా యింటికి దగ్గర్లో ప్రవహించే పాంగ్-సువా కెనాల్ చుట్టుపక్కల అలా 👆 కనిపిస్తూ వుంటుంది. ముఖ్యంగా వర్షాలు పడి కాలవ నిండుగా ప్రవహిస్తున్నప్పుడు. అయితే, అది చేపని పట్టేందుకు నీళ్ళ లోపలికి దూకి చేపతో పైకి రావటం ఇంతవరకూ చూడలేకపోయాను. ఆ అదృష్టం ఎప్పటికో!!

ఆంధ్రభోజుడి / తెలుగు వల్లభుడి పద్యంలో – తెలుగు సాహిత్యంలో పంచకావ్యాలులో ఒకటైన  కావ్యంలో చోటు దక్కించుకున్న ఈ పిట్ట పక్షిలోకానికి, తెలుగుభాషాప్రియులకి, తెలుగు ప్రకృతిప్రేమికులకీ సెలబ్రిటీయే!! ఇంతకీ మన సెలబ్రిటీ విల్‌ఫుల్ డిఫాల్టర్ తన ఎయిర్‌లైన్స్‌కి , బీరుకి లోగోగా వాడుకున్న కింగ్‌ఫిషర్ కూడా ఇదే.  బీర్ కింగ్ తెచ్చిన తలవంపులు, రాయలవారిచ్చిన సెలబ్రిటీ స్టేటస్‌తోనైనా ఈ లకుముకి మర్చిపోగల్గుతుందని ఆశిద్దాం.

ఈ దేశంలో కనపడే దగ్గర దగ్గర పది రకాల లకుముకుల్లో నాకిప్పటి వరకూ నాలుగే కనిపించాయి. వాటిలో ఇది మూడోది.  నాలుగో దాన్ని కిందటి పోస్టులో చూపించాను. ఒకటి, రెండు రాబోయే వనవిహారాల్లో.

బై4నౌ

🐾🌵🐋💦🌦🐢🐞🍁🍄🌾

హ్యాపీకార్తీకఏకాదశి+ఇందిరాగాంధీ  బర్త్ డే+ఇంటర్నేషనల్  మెన్స్ డే + ఇంటర్నేషనల్ టాయిలెట్ డే >>> అన్నీ ఇవాళే(ట)


ఇవాళ ఇంటర్నేషనల్ మెన్స్ డే అని వ్వాట్సప్ లో మెసేజులు స్వైరవిహారం చేస్తుంటే ఇదేంటా అని వికీపీడియా చూశా. నిజమే 1991 నుంచీ జరుపు తున్నారు(ట). ఎందుకో తెలుసుకునే ఆసక్తీ, అవసరం రెండూ లేవు. సో, తెలుసుకోలేదు. కానీ దాని పక్కనే ఇవాళే ఇంటర్నేషనల్ టాయిలెట్ డే అని కూడా ఉండడంతో అదేంటా అని చూశా. అది మన స్వచ్ఛ భారత్ ప్రాజెక్టుకి ఇంచుమించు సరిసాటి(ట) ఇంటర్నేషనల్ లెవెల్లో. ఓహో! అలాగా అనుకుంటుండగా గుర్తొచ్చింది, ఇవాళ ఇందిరాగాంధీ పుట్టినరోజు కూడానని. ఇంట్రెస్టింగ్ !! అనుకున్నా. అనుకున్నవన్నీ వాట్సాప్ లోకి ఎక్కించేశా . ఇంతలో వ్వాట్సాప్ లోనే ఓ మహాత్ముడు పెట్టిన పవిత్ర పుణ్య సందేశం – హ్యాపీ కార్తీక ఏకాదశి అని. ఇంకా హ్యాపీ శని త్రయోదశి , హ్యాపీ పోలాల అమావాస్య, హ్యాపీ మహాలయ పక్షమ్స్ , మెనీ హ్యాపీ రిటర్న్స్ అఫ్ తద్దినం …. వగైరా కూడా వస్తాయేమో అనుకోబోతూ లటుక్కున ఆ ఆలోచన ఆపేశాను, ఎందుకొచ్చిన గొడవ అని.
కానీ మంకీ మైండ్ ఊరికే ఉండదు కదా!! తెలుసుకున్న విషయాలన్నీ కలిపి చూడ్డం మొదలెట్టింది.
ఇంటర్నేషనల్ మెన్స్ డేని ప్రారంభించిన పెద్దమనిషి, జెరోమ్ తీలక్సింగ్**, అన్నాయన ఈ రోజు ప్రాముఖ్యతని ఇలా చెప్పాడు (ట ) – “the day ‘s activitees strive for gender equality and patiently attempt to remove the negative images and the stigma associated with men in our society.”

ఆయన మేల్-షావినిజానికి వ్యతిరేకి అనిపించేలా వున్నాయి కదూ ఆ మాటలు!?!

(** పేరు స్పెల్లింగుని బట్టీ ఈయనెవరో ఇండియన్ ఆరిజిన్ పెద్ద మనిషిలా వున్నాడు)

నేను తృప్తి దేశాయ్ సపోర్టర్ని కాదంటే కాదు. కానీ మనదేశంలో జెండర్ ఈక్వాలిటీ ఉందంటే మాత్రం నమ్మలేను. కాబట్టి ఈ డేని బాగా జరుపుకోవడం అవసరం అనిపించింది.

నెక్స్ట్, ఇందిరాగాంధీ బర్త్ డే. ఒకప్పుడు ఒకాయనెవరో – వాజ్-పాయా🤔? ఏమో గుర్తులేదు – “కాంగ్రెస్ పార్టీలో ఉన్న ఒకే ఒక్క మగాడు , ఇందిరాగాంధీ,” అన్నాట్ట. అందులో పెద్ద సందేహం లేదని చాలామంది నిస్సందేహంగా చెప్పడం విన్నాను. అంచేత ఇంటర్నేషనల్ మెన్స్ డే రోజు భారతీయ మగమహారాజులు ఇందిరాగాంధీ నుంచి నేర్చుకోవాల్సింది చాలా ఉందని నొక్కి చెప్తోంది ఈ నవంబర్ 19 అనిపించింది. అసలు జయలలిత కూడా ఈ రోజునే పుట్టి ఉంటే ఇంకా బావుండేదని మరీ మరీ అనుకున్నా. అనుకోకుండా ఎలా వుంటాం? మగ అరవ పొలిటీషియన్లు అరవడం మర్చిపోయి ఆవిడకి పొర్లుదండాలు పెట్టే సీన్లు చూశాక?

నెక్స్ట్ –

ఇంటర్నేషనల్ టాయిలెట్ డే. స్వచ్ఛ్ భారత్ కి ఇంటర్నేషనల్ వెర్షన్ అన్నాను కదా! మోడీ మేష్టారి కలలకి ప్రతీక అయినటువంటి ప్రాజెక్టుకి ఇంచుమించు సరిసాటి. కనక ఇదీ ముఖ్యమైన రోజే. జెండర్ ఈక్వాలిటీ మీద మోడీ మేష్టారి అభిప్రాయం ఏంటో బేటీ బచావో! బేటీ పడావో!! అనే ఒక్క స్లోగన్ తో చెప్పేహారు కదా! ఇప్పుడింక స్విస్ బ్యాంకుల్నించి ఒక్కొక్కళ్ళ అకౌంట్లో 15 లక్షలు పడగానే ఇంక దేశంలో బేటీలందర్నీ బచాయించడం, పడాయించడం షురూ అయిపోతుంది. ఏం భయం లేదు!!

ఇప్పుడింక (హ్యాపీ) కార్తీక ఏకాదశి గురించి. శివుడిని మించి జెండర్ ఈక్వాలిటీ పాటించేవాళ్ళు దేవుళ్ళల్లోనూ లేరు. అంచేత నవంబరు 19న వచ్చిన ఈ కార్తీక ఏకాదశి అర్ధనారీశ్వరుడికి అత్యంత ప్రీతిపాత్రమైనదని దేశంలో తెలిసికానీ, తెలీకుండా కానీ పురుషాహంకారం ప్రదర్శించే వాళ్లంతా గ్రహించవలసిన పుణ్యదినం. మళ్ళీ ఎన్నో ఏళ్ళక్కానీ రాదు.
కనుక-
డియర్ ఇండియన్ మెన్!!
ఈ రోజు శివపార్వతుల్ని పూజించి ఉపవాసం చేసి ఇందిరాగాంధీ అపరదుర్గ అయిన విధాన్ని తెలుసుకొని ఆపైన మీ గృహమున గల టాయిలెట్లను సవినయముగా, అహంకార రహితులై శుభ్రపరచుడు. అంతట తరతరాలుగా మీలో పేరుకుపోయిన పురుషాహంకారము నశించి, జన ధన్లు, స్లోగన్లు లేకపోయినా బేటీ బచావో, బేటీ పడావో సాకారమగును.

అన్నట్టు మరిచిపోయాను, ఈ సూచనలు తెలిసికానీ, తెలీకుండా కానీ పురుషాహంకారం వదిలేసిన వాళ్ళకి నాట్ అప్లికబుల్!!

అరే! ఇంకో ఇంపార్టెంట్ క్లూ ఇవ్వడం మర్చిపోయా! మనలో పురుషాహంకారం వుందో లేదో తెలిసేదెలా? తెలుసుకోడం చాలా ఈజీ!

ఈ టపా చదువుతుంటే నవ్వొస్తే పురుషాహంకారం లేనట్టు,

ఒళ్ళు మండిపోయి, జంధ్యాల సినిమాలో సుత్తి వీరభద్రరావుల్లా ఫీలైతే……

ఫిల్ ఇన్ ది బ్లాంక్ 😉😁

ఓకే! బై4నౌ🖐😎

************************

vedika

your forum for critical and constructive writings

మీ వెంకట్

నాలోని భావాలు, భావోద్వేగాలు

నా కుటీరం

సమాజం, సాహిత్యం, సౌందర్యం

Kadhana Kuthuhalam

మరపురాని కథలను మళ్ళీ చదువుదాం.!

🌿🐢YVR's 👣Walks🐾With🌾Nature🐌🍄

🌻Look deep into nature, and then you will understand everything better 🌹 👨‍🔬Albert Einstein👨‍🏫

ఉహల ఊసులు

కవిత్వం, వంటా - వార్పు, మనసులో మాటలు, అక్కడ - ఇక్కడ

Prasad Oruganti

“I've learned that people will forget what you said, people will forget what you did, but people will never forget how you made them feel”— Maya Angelou

A Birder's Notebook

"Learning to bird is like getting a lifetime ticket to the theater of nature".

SEEN ALONG THE TRAIL

"I am at home among trees." -J.R.R. Tolkien

BUDGET BIRDERS

birding the world on a budget

Mike Powell

My journey through photography

Birder's Journey

"If you want to see birds, you must have birds in your heart." -- John Burroughs

Singapore Bird Group

The blog of the NSS Singapore Bird Group

MORGAN AWYONG

little truths . little deaths

Animals in South-East Asia

By Andrew Rhee (http://blog.daum.net/fantasticanimals)

Singapore Birds Project

Singapore birds information for birders by birders

Life is a poetry

Life is a beautiful journey. Live, discover, feel and fall in love with it

vedika

your forum for critical and constructive writings

మీ వెంకట్

నాలోని భావాలు, భావోద్వేగాలు

నా కుటీరం

సమాజం, సాహిత్యం, సౌందర్యం

Kadhana Kuthuhalam

మరపురాని కథలను మళ్ళీ చదువుదాం.!

🌿🐢YVR's 👣Walks🐾With🌾Nature🐌🍄

🌻Look deep into nature, and then you will understand everything better 🌹 👨‍🔬Albert Einstein👨‍🏫

ఉహల ఊసులు

కవిత్వం, వంటా - వార్పు, మనసులో మాటలు, అక్కడ - ఇక్కడ

Prasad Oruganti

“I've learned that people will forget what you said, people will forget what you did, but people will never forget how you made them feel”— Maya Angelou

A Birder's Notebook

"Learning to bird is like getting a lifetime ticket to the theater of nature".

SEEN ALONG THE TRAIL

"I am at home among trees." -J.R.R. Tolkien

BUDGET BIRDERS

birding the world on a budget

Mike Powell

My journey through photography

Birder's Journey

"If you want to see birds, you must have birds in your heart." -- John Burroughs

Singapore Bird Group

The blog of the NSS Singapore Bird Group

MORGAN AWYONG

little truths . little deaths

Animals in South-East Asia

By Andrew Rhee (http://blog.daum.net/fantasticanimals)

Singapore Birds Project

Singapore birds information for birders by birders

Life is a poetry

Life is a beautiful journey. Live, discover, feel and fall in love with it

Why watch wildlife?

A site dedicated to watching wildlife

Discover

A daily selection of the best content published on WordPress, collected for you by humans who love to read.

Gangaraju Gunnam

What I love, and mostly, what I hate

చిత్రకవితా ప్రపంచం

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

సాహితీ నందనం

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

బోల్డన్ని కబుర్లు...

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

భండారు శ్రీనివాస రావు – వార్తా వ్యాఖ్య

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

SAAHITYA ABHIMAANI

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

లోలకం

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

zilebi

Just another WordPress.com site

కష్టేఫలే

సర్వేజనాః సుఖినోభవంతు

అంతర్యామి - అంతయును నీవే

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

ఎందరో మహానుభావులు

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

వరూధిని

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

హరి కాలం

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

The Whispering

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

Satish Chandar

Journalist. Poet. Writer

పిపీలికం

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

పని లేక..

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

గురవాయణం

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

పక్షులు

🌊అలోలములాలోచనలేవేవో నా లోపల ప్రాలేయచ్ఛాయల వలె తారాడగ కోరాడగ 🌊

ఆలోచనలు...

అభిమానంతో మీ ప్రవీణ.....

Vu3ktb's Blog

Just another WordPress.com weblog

ఆలోచనాస్త్రాలు

............... ప్రపంచంపై సంధిస్తా - బోనగిరి

abhiram

album contains photos of my thoughts & feelings

%d bloggers like this: