Category: కాఫీత్వ

We confuse-You refuse అల్లాటప్పాఛానల్ డిస్కషన్ ఫోరం


కొలావెరి స్టేషన్లో జరిగిన తొక్కిసలాటలో ప్రయాణికుల మృతిపై అల్లాటప్పా ఛానల్ డిస్కషన్.

వెల్-కమ్ టు అల్లాటప్పా ఛానల్’స్ డిస్కషన్ ఫోరం. యువర్స్ ట్రూలీ అల్లాటప్పేష్ హియర్. జరిగిన దురదృష్ట సంఘటన పై తన అభిప్రాయాల్ని మనతో పంచుకోడానికి   ప్రముఖ సామాజిక పరిశీలకులు, సంస్కర్త  శ్రీ ఫలానారావుగారు, అలాగే ప్రముఖ మేధావి బుర్రా మోకాల్ గారు ఇప్పుడు మనతో స్టూడియోలో వున్నారు. నమస్కారం ఫలానారావు గారు, మోకాల్ గారు. ఫలానారావ్ గారు ముందుగా మీరు చెప్పండి. ప్రఖ్యాత సామాజిక పరిశీలకుడిగా నిన్న కొలావెరి  స్టేషన్లో జరిగిన తొక్కిసలాటలో ప్రయాణికులు మృతి చెందడంపై మీరేమంటారు? ఇది ప్రభుత్వ వైఫల్యమా, ప్రయాణికుల ఆత్రుతా లేక ఇంకేవైనా కారణాలున్నాయంటారా?

ప్రతి చిన్న విషయానికి ప్రభుత్వాన్ని నిందించటం పరిపాటి అయిపోయిందండి అల్లాటప్పేష్ గారూ. ప్రయాణికులు ఎక్కడికెళ్తే అక్కడ స్టేషన్లు కట్టి రైళ్ళు నడిపించటం ప్రభుత్వం పని. అంతకు మించి వాళ్ళేం చేస్తారండి? వాళ్ళని తప్పు పట్టాల్సిన అవసరం ఖచ్చితంగా లేదండి. అలాగే ప్రయాణికులని అనడానికీ ఏమీలేదు. వాళ్ళ వాళ్ళ పనులలో వాళ్ళుండి ఊళ్ళకి వెళ్లాలనే ఆత్రుతలో తప్పు పట్టాల్సిందేముందండీ?

ఇక్కడో మాట చెప్పుకోవాలి ఫలానారావ్ గారు. ప్రయాణికులంటే వుట్టి ప్రయాణికులే కాదండి, ప్రజలు. ప్రజలంటే వోట్లు. వాళ్ళనేమన్నా అంటే కళ్ళు, కాదు వోట్లు, వోట్లు పోతాయండి. సో, వాళ్ళని తప్పుపట్టే అవకాశం వుండకూడదండి.

మీరన్నది అక్షరసత్యం. ప్రజలంటే దేవుళ్ళు కదండీ. వాళ్ళలో మార్పు ఆశించటం, నేర్పించటం అంటే మన అస్తిత్వాన్ని మనం సందేహించటమే. అందువల్ల ప్రజల గురించి డిస్కస్సే చెయ్యకూడదండి.

అంతే కాద్సార్! ప్రజాస్వామ్యం అంటే ప్రజలే ప్రభుత్వం. కనక ప్రభుత్వం గురించి మాట్లాడినా ప్రజల గురించి మాట్లాడినట్టే అవుద్దండి.

అందులో సందేహమేముందండి? ఈ చర్చ  ప్రజల్ని, ప్రభుత్వాన్ని బోనులో నిలబెట్టడం కోసం కాదండి. దుర్ఘటనకి బాధ్యులైన వ్యక్తులెవరో తేల్చటం.

ఒక్క నిముషం, ఫలానారావుగారు, దుర్ఘటనకి ప్రత్యక్ష సాక్షి తిక్క శంకరయ్యగారు లైన్లో ఉన్నారు. ముందుగా వారి ప్రశ్న ఏమిటో విందాం. ఓకే!తిక్క శంకరయ్యగారూ! సార్ వింటున్నారు. మీరు మాట్లాడండి.

సార్! నమస్కారం సార్! ఫలానా రావు గారు! నా పేరు తిక్క…

నమస్కారం తిక్క శంకరయ్య గారు, మీరేం అడగాలనుకున్నారో అడగండి.

అవున్సార్! మిమ్మల్ని ఒకటి అడగాలనుకున్నాం……… మా ఫామిలీ అంతా మీ అభిమానులం సార్!

మంచిదండి, మీరేదో అడగాలన్నారు, అడగండి.

సార్?

అదేనండీ, మీరేదో అడగాలన్నారు కదా అడగండి.

ఓకే సార్! అదే సార్ తొక్కిసలాటకి స్టేషన్ మాస్టర్ బాధ్యత ఏమీ లేదంటారా? కొంచెం మీ వివరణ చెప్పండి సార్.

అయ్యా! నేనో సామాజిక సంస్కర్తని. సామాజిక స్పృహతో మాట్లాడ్డం నా స్వభావం, నా బాధ్యతాను.

సార్!

అయితే స్టేషన్ మాస్టర్ ప్రభుత్వోద్యోగి. ప్రభుత్వానికీ, సామాజిక విషయాలకి లంకెలా పెడతామండి? ప్రభుత్వం జోక్యం చేసుకోని, చేసుకోకూడని జోన్ ని సామాజికం అంటారండి. ఆ విషయం దృష్టిలో ఉంచుకుని స్టేషన్ మాస్టర్ పాత్రపై ఆలోచిస్తే మన తక్షణ కర్తవ్యం ఏమిటో బోధపడుతుంది.

ఛా! నిజమా! సార్!?!?!

అవును. స్టేషన్ మాస్టర్  పని ప్రభుత్వం కట్టించిన స్టేషన్లో కూచుని రైలు రావడానికీ, వెళ్లడానికీ జెండా ఊపడం. ఈ బాధ్యతా నిర్వహణలో ఆయన లోపాలేం కనబడ్డంలేదు. ఆయన్ని తప్పు పట్టే అవకాశం లేదండి.

ఓకే సార్. థాంక్యూ సార్! ఉంటానండి.

మంచిదండి శంకరయ్య గారు. ఇప్పుడు చెప్పండి ఫలానారావ్ గారు, జరిగిన ఘోరానికి బాధ్యత వహించి యాత్రికుల దుర్మరణం అనే పాపాన్ని మూట కట్టుకోవాల్సిందెవరు? చెప్పండి ఫలానారావు గారూ, ఈ పాపాన్ని మూట కట్టాల్సింది రైలు ఆలస్యంగా నడిపి, రద్దీ పెరగడానికి పరోక్షకారణమైన డ్రైవరు అంటే అది తప్పా? 

తప్పేనండి. డ్రైవరు కూడా ప్రభుత్వోద్యోగే, సిగ్నల్సు ప్రకారం రైలు నడపడమే అతని డ్యూటీ. ఆలస్యం వల్ల స్టేషన్లో రద్దీ పెరిగితే ఆయనేం చెయ్యగలడు? సమయానికి రైలు నడపడం అతని ఒక్కడి చేతిలోనే ఉండదు కదా. రైల్వే ట్రాఫిక్కూ, సిగ్నల్ వ్యవస్థలో లోపాలు, రాస్తారోకోల వల్ల రైళ్ళు ఆగిపోవడం ఇలాంటివెన్నో వుంటాయి. ఆయన్ని అనడం అధర్మం.

మరైతే ఎక్కువ రైళ్ళు నడిపి రద్దీని సరిగ్గా మేనేజ్ చెయ్యలేకపోవడం రైల్వేల అసమర్ధత కాదా? 

రైల్వేలూ కాదండీ, వారికున్న నిధుల కొద్దీ వాళ్ళు రైళ్ళు నడుపుతారు. అక్కడికీ వీలైనన్ని రైళ్ళు నడిపి రద్దీ తగ్గిస్తూనే వున్నారు. ఒక ప్రభుత్వ శాఖ పని చెయ్యడం మాటలా? ఎన్నెన్నో తలనొప్పులు. ఒక్క స్టేషన్లో జరిగిన దానికి రైల్వే శాఖని, ఆ మంత్రిని బ్లేమ్ చెయ్యడం అన్యాయం.

మరైతే జనాల్లో ఆదుర్దా పెంచి అందరూ ఒక్కసారే రైలెక్కడానికి ఉరకలెత్తించి ఇన్ని ప్రాణాల్ని ఆర్పేసిన బాధ్యత ఎవరిది సార్? ఎవరిది?

చూడండి అల్లాటప్పేష్ గారు. తప్పు, ఖచ్చితంగా, రైలొచ్చే టైముకి గణ గణ గణ గంట కొట్టి ప్రయాణికుల గుండెల్లో రైళ్ళు పరుగెట్టించిన ఆ గంట కొట్టేవాడిదేనండీ. ప్రయాణికులు ఆలోచించలేరు, ఆదుర్దా మాత్రమే పడగలరు. ప్రభుత్వం అన్నీ పట్టించుకునే అవకాశం వుండదు. ఇవన్నీ తెలిసీ అంత గట్టిగా, జనం ఝడుసుకునేలా గంట కొట్టి, రైలొచ్చేస్తోందని కంగారు పెట్టేలా ప్రవర్తించిన ఆ గంటవాడిదే తప్పంతా. వాడిదే పూర్తి బాధ్యత. నేనూ ఇంతకూ ముందు బడిలో గంట కొట్టినవాడినే, మీరూ గుడిలో గంట కొట్టేవుంటారు. మనందరికీ తెలుసు గంట శబ్దం భావోద్వేగాల్ని పురి కొల్పుతుందని. కావాలంటే బళ్ళో ఇంటి బెల్లు కొట్టగానే పొలోమంటూ పరుగులెత్తే పిల్లల్ని చూస్తే తెలీదా? గుళ్ళో గంట కొడుతుంటే మీ బుర్రలో సుళ్ళు తిరిగే కోరికల చిట్టా తెరిస్తే తెలీదా? ఇన్నీ తెలిసీ అంత భయంకరంగా, మూఢంగా, మూర్ఖంగా గంట కొట్టిన వాడిదే ఈ నేరం, ఈ ఘోరం, ఈ పాపం.

బుర్రా మోకాల్ గారు ఇంతవరకూ మౌనంగా వున్నారు. సార్! మీరు చెప్పండి గంట కొట్టేవాడిదే బాధ్యతని ఫలానావారు అంటున్నారు. మీరేమంటారు?

ఫలానారావ్ గారితో ఏకీభవిస్తానండీ. ప్రేక్షకులకీ, మీకూ కూడా సవినయంగా మనవి చెయ్యాల్సిందొకటుందండి. ఈ గంటలుకొట్టేవాళ్ళ విషయంలో నాది ప్రత్యేకమైన, సుదీర్ఘమైన అనుభవం. నేను తొమ్మిదో తరగతి మొదటిసారి చదివినప్పటికీ తొమ్మిదోసారి చదివినప్పటికీ – అంటే ఆ తొమ్మిదేళ్ళలో బళ్ళో కొట్టే గంటల శబ్దంలో విపరీతమైన, అవాంఛనీయమైన మార్పు వచ్చిందండి. ఇదే కాలంలో గుళ్ళల్లో గంటల శబ్దంలో కూడా సమాంతర మార్పు సంభవించిందండి. ఇన్ని రంగాల్లో గంటలు మారుతున్నప్పుడు రైల్వే స్టేషన్ గంటలు మారవనుకోవడం శుద్ధ అమాయకత్వమండి. ఐతే మనం గమనించాల్సిన విషయం మరోటుంది. గంట సంగతలా వుంచితే, జనాన్ని ఆకర్షించాలనే గంట కొట్టేవాడి తాపత్రయం, ఆజ్ఞానంనుండి పుట్టిన అనవసర ఆవేశం, మూఢత్వం ఇందులో పెద్ద పాత్ర వహిస్తాయండి.

సార్! తిక్క శంకరయ్యగారు మళ్ళీ లైన్లో ఉన్నారు… శంకరయ్యగారూ చెప్పండి, మీ బుర్ర దొలుస్తున్నదేమిటో!

సార్! నాక్కొంచెం తిక్కండి, ఎప్పుడైనా ఒకసారి దానిక్కొంచెం లెక్కుంటుందండి. ఇప్పుడీ చర్చా ……

ఐతే మీ లెక్కేంటో చెప్పండి.

సార్!?!

మీ లెక్కేంటో చెప్పండీ!!

ఈ సంఘటనకి సంబంధించి నిర్ణయాలు తీసుకోవాల్సిన అధికారులదీ, రైల్వే శాఖదీ తప్పులేదన్నారు. బానేవుంది. ఐతే గంట కొట్టమంటే కొట్టే వుద్యోగినీ … అంటే నా ఉద్దేశం, అతని డ్యూటీ రైలు దగ్గరికొస్తోంటే గంట కొట్టడం…. ఆ గంట శబ్దం…గర్ ర్ ర్ ర్ ……ప్రయాణీకుల…. గర్రర్ర్ర్…గుర్….ర్…ర్

లైన్లో ప్రాబ్లం అనుకుంటా. సమయాభావం మన చర్చ ముగించాల్సివుంది. సో, అల్లాటప్పా ఛానల్ ప్రేక్షకులందరూ విన్నారుగా! ఫలానారావు గారు, బుర్రామో కాల్ గార్ల అభిప్రాయాలు. లైన్లో లోపంవల్ల శంకరయ్యగారి కాల్ కట్ అయ్యింది కానీ వినబడినంతవరకూ ఆయనా మనతో ఏకీభవిస్తున్నారని తెలుస్తోంది. మనతో వున్న పరిశీలకులు, మేధావులూ అభిప్రాయపడుతున్న దాన్ని బట్టీ – రైల్వే స్టేషన్లలో జరిగే తొక్కిసలాటలన్నిటికీ, నిన్న కొలావెరి స్టేషన్లో జరిగిందాంతో సహా- నిస్సందేహంగా -గట్టిగా చెవులు చిల్లులు పడేలా గంటలు కొట్టిన, కొడుతున్న, సమీప భవిష్యత్తులోనూ కొట్టబోతున్న ఆ గంటలు కొట్టేవాళ్ళదే బాధ్యత. రైల్వేశాఖ, సంబంధిత అధికార్లు, ఎవడి గోల వాడిదిలా వుండే ప్రయాణికులు – వీళ్ళెవరికీ సంబంధం, బాధ్యతగానీ, అవి వుండే అవకాశాలు గానీ లేవని ఈ పెద్దలందరి అభిప్రాయం. గంటలు కొట్టేవాళ్ళు విధిగా ప్రజల భావోద్వేగాలనీ, మనోభావాలనీ, ఇంకా ఏమైనా వుంటే వాటినీ, ఏమీ లేకపోతే వాటినీ కూడా దృష్టిలో వుంచుకుని బాధ్యతగా గంట కొట్టి అమాయక ప్రయాణికుల్ని సురక్షితంగా ఉంచాలని దేశం మొత్తం భావిస్తోంది. ఈ సందర్భంగా ఈ విషయంలో ప్రభుత్వం ఏం చెయ్యబోతోంది? ఎన్నాళ్ళ వరకూ గంటలు కొట్టేవాళ్ళ అలసత్వాన్ని ఉపేక్షిస్తుందీ ప్రభుత్వం? ప్రతిపక్షం నిర్మాణాత్మకంగా వ్యవహరించగలదా ? ఈ ప్రశ్నలన్నీ మన ముందున్నాయ్. ఆ వివరాలన్నిటితో త్వరలో మీ ముందుకి వస్తోందీ .. అల్లా..టప్పా టీవీ. గుడ్ బై.
మీ అభిప్రాయాలూ, సూచనలూ మా తొక్కలోన్యూస్@అల్లాటప్పా.కామ్ కి పంపండి. We confuse, You refuse.

????!!!!????!!!!????!!!!????!!!!????!!!!????!!!!????!!!!????!!!!????!!!!????!!!!????!!!!????

అదండీ కధ. పంతొమ్మిదో కాఫీకి టాపిక్కేంటా అని ఆలోచిస్తుంటే తట్టిన ఐడియా. మన్ని మేలుకొలుపుతున్నామంటూ ఒక్కొక్కరూ ఒకో రకం చొప్పున మన మైండ్స్ లోకి, యా డైరెక్ట్ గా మైండ్స్ లోకే, ఇంజెక్ట్ చేసేస్తున్న మత్తుల వైనం. ఎంతమంది ఎన్ని కప్పుల కాఫీలు సేవిస్తే ఈ మత్తు దిగుతుందో !?! అందుకే గావాఁలు (కొందరు కామోసు / కాబోలు అంటారు) Antoine Galland అనే ఫ్రెంచి రచయిత, పురాతత్వ శాస్త్రజ్ఞుడు – “Coffee joins men, born for society, in a more perfect union; protestations are more sincere in being made at a time when the mind is not clouded with fumes and vapors, and therefore not easily forgotten, which too frequently happens when made over a bottle,” అన్నాడు. బాటిల్ అనేది అందరికీ వర్తించకపోవచ్చు దాని స్థానంలో మనకున్న సవాలక్ష ‘మత్తు’ పదార్ధాలతో ప్రతిక్షేపిస్తే సరిగ్గా సరిపోతుంది. బై4నౌ _/\_ 🙂

స’శేషం’

కాఫీత్వ18-పాంటు వేసుకోడం మర్చిపోయి,ఎదుటివాడి చొక్కా బాలేదని ఎక్కిరించి…


అధః శ్రీ అష్టాదశమ కప్పు కాఫీత్వః,

కాఫీ పాపులారిటీ పెరిగిన పద్ధెనిమిదో శతాబ్దంలోనే ఎలా పెరిగిందో కానీ చికరీకీ ప్రాధాన్యత పెరిగింది. దానికున్న మెడిసినల్ క్వాలిటీస్ వల్ల కావచ్చు. ఏమైనా అది ప్యూర్ కాఫీలోని స్వచ్ఛతని, ఫ్రెష్-నెస్సుని, పవిత్రతని దెబ్బ తీస్తోందా లేదా? తీస్తోంది. నిదర్శనం కావాలా? జర్మన్ స్టేట్స్-మన్, ఛాన్సలర్ బిస్మార్క్ కి ఆపాదించబడిన ఈ ఉదంతం, ఎనెక్-డోట్, చదివితే కాఫీ యొక్క స్వచ్ఛత ఎంత ముఖ్యమన్న విషయంపై ఆలోచించాలనిపించొచ్చు. పర్టిక్యులర్లీ సో, ఇఫ్ యూ నో వాట్ బిస్మార్క్’స్ కంట్రిబ్యూషన్స్ వర్ టు మోడర్న్ జర్మనీ –
Among coffee drinkers a high place must be given to Prince Bismarck (1815-1898). He liked coffee unadulterated. While with the Prussian army in France, he one day entered a country inn and asked the host if he had any chicory in the house. He had. Bismarck said: “Well, bring it to me; all you have.” The man obeyed, and handed Bismarck a canister full of chicory.
“Are you sure this is all you have?” demanded the chancellor.
“Yes, my lord, every grain.”
“Then,” said Bismarck, keeping the canister by him, “go now and make me a pot of coffee.”
సత్యం అనేది కాఫీ అనుకుంటే(ఇదివరకు అనుకున్నాం) దాన్ని ఆచరణలో పెట్టే విధం స్టీమింగ్ గోల్డెన్ బ్రౌన్ ఫిల్టర్ కాఫీ కలపడంతో సమానం. అటువంటి సత్య దర్శనం మనిషికి చేయించే ముఖ్యసాధనం మతం. అలాంటి మంచికాఫీలాంటి మతం –

ఛాందసవాదం, ప్రతివాది భీకరత్వం వంటి చికరీ,
దురాచారాలు, వక్రభాష్యాలు, ప్రచారం, మత మార్పిళ్ళు, మైనారిటీ రాజకీయాల్లాంటి చింతపిక్కలపొడి
కుహనా సెక్యులరిజంలాంటి తొరకలతో
కల్తీ అయితే అత్యంత నాసిరకపు కాఫీ తయారై ఉదరసంచలనం కలిగిస్తుంది.

ప్యూర్ కాఫీలాంటి మతం ఎప్పటికీ మత్తు కాదు. చికరీ, చింతపిక్కలపొడి, తొరకలు కలిసిన, అంటే, ఛాందసవాదుల అతి ఎక్కువైన; మితి మీరిన మతం కాఫీ ఎన్నటికీ కాదు. మత్తు. అలాగే గుడ్డిగా మతాన్ని ఖండించడం, ద్వేషించడం కూడా ఇంకొక రకం మత్తే తప్ప మేలుకోవడం కాదు. ఈ సత్యం పదహారు కప్పుల కాఫీ అయ్యాక్కానీ తట్టనటువంటి నా మట్టిబుర్ర క్కూడా గ్రహింపుకొచ్చే మరో రకం మత్తు గురించి ఊకదంచడమే ఈ పద్ధెందో కప్పుకి థీమ్. కొంత లాజికల్ గా , తెలుగు వంటబట్టిన మెదడైతే తార్కికంగా, ఆలోచించే కెపాసిటీ రాగానే మేధావి వర్గంలో మెంబర్షిప్ వచ్చేసినట్టు ఫీలయ్యే మత్తు వర్గం ఒకటుంది. ఇందులో ఉపవర్గాలుంటాయ్. పుర్రెల్లో పుట్టిన లాజిక్కుల్ని బట్టీ –

మతాన్ని గుడ్డిగా ఖండించే వర్గం ఒకటి.
రెండోది కేవలం సొంతమతంలోనే తప్పులు పట్టేది.
మూడోది ఎదుటి వాడి మతానికి ఈకలు పీకేది.

నిజానికి ఈ మూడు ఉపవర్గాల ఉనికికి కారణం వారివారి వాదాలకి ప్రతివాదాలు అతిగా చేసే ప్రతిపక్షులు, కౌంటర్-పార్ట్స్, సొసైటీలో ఉండడమే. వాళ్ళ గురించి నెక్స్ట్ కప్ ఆఫ్ కాఫీత్వలో..

లీస్ట్ ప్రాబ్లెమాటిక్ ఈజ్ ద ఫస్ట్ కేటగరీ. అంటే వీళ్ళతో అసలు ప్రాబ్లెం లేదని కాదు. తక్కిన వాళ్ళతో పోలిస్తే కొంచెం తక్కువ, అంతే. బట్టలు వేసుకునే వాడే మనిషి అనబడటానికి అర్హుడు అని సొసైటీ ఒక రూలు పెడితే, ఛస్! అదేంలేదు. బట్టలు కట్టుకోవడం మూఢనమ్మకం, అసలు శాస్త్రీయం కాదు అని ఒకడు బయలుదేరాడనుకోండి. అదుగో అలాంటివాడే మొదటి ఉపవర్గానికి మూలపురుషుడు.

ఇప్పుడు రెండో కేటగరీ. వీళ్ళు బట్టలు వేసుకోడానికి వ్యతిరేకులు కాదు కానీ ఏ బట్టలు వేసుకున్నా అవి బాలేవని గొణుగుతూ, గోలపెడుతూ… అసలు బట్టలేసుకోవాలా వద్దా అనే గందరగోళం మామూలు మనుషుల్లో పుట్టిస్తారు, వాళ్ళు బుద్ధిగా బట్టలేసుకు తిరుగుతున్నవాళ్ళే అయినా సరే. దట్స్ వై దీజ్ గయ్స్ ఆర్ ఏ న్యూసెన్స్.

ఇహపోతే మూడో వర్గం. తను పాంటు వేసుకోడం మర్చిపోయిన సంగతి వదిలేసి ఎదుటివాడి చొక్కా బాలేదని ఎక్కిరించి, ఆ చొక్కా ఎలావుంటే బావుంటుందో తర్కించి, చర్చించి, నిగ్గు తేల్చేసే వర్గం ఇది. సొంత మతమే బెస్ట్ ఐతే అందులో దురాచారాలు ఎందుకు బయల్దేరాయనే విషయం వీళ్ళకి పట్టదు. ఒకవేళ పట్టినా వాటికి వాళ్ళ దేవుడు వేసే శిక్షలే పరిహారం, వాళ్ళ మత పెద్దలు చెప్పేదే నిజం. ఈ వర్గం న్యూసెన్స్ అండ్ డేంజరస్. దురదృష్టవశాత్తూ ఈ రోజుల్లో ఈ వర్గపు హల్-చలే ఎక్కువ. That’s all 4 now, Hope the coffee is strong enough _/\_ 🙂

స’శేషం’

కాఫీ కలపడం బ్రహ్మవిద్యా? రాకెట్ సైన్సా? నైమిశారణ్యంలో 17th cup


పదహారో కప్పులో మతం, మత్తుమందు ఎట్సెట్రా ఎట్సెట్రాలతో చిక్కటి ఇంటలెక్చువల్ కాఫీ అయింది కనక పదిహేడో కప్పు కాస్త లైటుగా –

ఒకప్పుడు నైమిశారణ్యంలో జరిగిన విషయం() ఇది. కాఫీ కలపడం ఏమన్నా బ్రహ్మవిద్యా? రాకెట్ సైన్సా? అని అక్కడి విద్వత్లోకం / విద్వల్లోకం (రెండిట్లో ఏది కరెక్టో తేల్చుకొనే బాధ్యత చదువరికి వదిలివేయడమైనది, తేల్చుకోవాలనిపించడం తెలుగుతల్లి చేసుకున్న పుణ్యమనీ, విద్వల్లోకం అనుటయే సరియనీ నాయనుమానము) లో చర్చోపచర్చలు జరిగి అన్నం పరబ్రహ్మ స్వరూపం కనకా, మనుషుల ఆహారములో కాఫీ ప్రధానభాగం కనకా – దేర్ ఫోర్, యెస్స్! కాఫీ కలపడం బ్రహ్మవిద్యే అనవచ్చని తేల్చారట. (ఇంచుమించు అను prefix = ఉపసర్గ = పూర్వప్రత్యయము=టిత్తు వాడటం మస్ట్ అని నియమం ఏర్పరచారట. ‘ఇంచుమించు’ వాడని వాడు ఎప్పుడు పడితే అప్పుడు కప్పెడు కాఫీ నొసంగని సుజనులు చొప్పడనట్టి వూరిలో అఘోరించెదరని కూడా సెలవిచ్చారట. ఎందుకనగా ఆ కాలములో కాఫీ త్రాగడం అంటే భ్రష్టత్వమని అనేకులు – ప్రాచ్యులు, పాశ్చాత్యులూ కూడా – నమ్మేవారుట.) అంతేకాక ఇది విష్ణువు వద్ద బ్రహ్మ నేర్చిన విద్య కూడా కనుక ఇది ఇంచుమించు బ్రహ్మవిద్యేనని నిర్ణయించారట.

అదెట్లన, ఇట్లు –

ఒకానొక సందర్భంలో బ్రహ్మ సృష్టికర్త బాధ్యతల్లో తలమునకలైపోయి అలిసి కునుకుతీస్తూ ఆవలించినప్పుడు ఆవలింతలోంచి ఒక రాక్షసుడు ఊడిపడతాడు. విష్ణువు ఏ రాక్షసుణ్ణీ వాడి టైమయ్యేవరకూ చంపడుగదా. ఈ లోపు వాడు చెయ్యాల్సిన విధ్వంసం అంతా యధావిధిగా చట్టం “తన పని” తాను చేసుకుపోయినట్టు చేసేస్తాడుగదా. (ఈ సత్తెకాలపు రాక్షసులకి, చట్టానికి ఒక తేడాలాంటి పోలిక (or) పోలికలాంటి తేడా వుంది. విష్ణువు యోగనిద్రలోంచి మేలుకునేవరకూ రాక్షసుడాగడు. ఏ సీఎమ్మో, పీఎమ్మో ఉసిగొలిపే వరకూ చట్టం ముందుకి దూకదు, యోగనిద్ర పోతూ వుంటుంది. ఈ విష్ణుమాయను లేటెస్టుగా రియలైజ్ చేసి పునీతులైన మహనీయులు రేవంత్ రెడ్డి, సుష్మా స్వరాజులు. విష్ణుమాయా ప్రయోగ-ఉపసంహరణ విధానములను దివ్యదృష్టితో గ్రహించిన కురువృద్ధులు ఇండియాలో ఎమర్జెన్సీ మళ్ళీ వచ్చే అవకాశాలున్నాయని పంచాంగ శ్రవణము ప్రారంభించినారు. మరోప్రక్క  రాహుల్-గాంధీ మహాత్ముడు ఈ మధ్య ఆత్మహత్య చేసుకున్న రైతుల కుటుంబాలని మళ్ళీ మళ్ళీ కలుస్తుండడం చూస్తుంటే ఆయనలో విష్ణ్వంశ, చట్టం అంశ రెండూ వున్నట్టు తెలుస్తున్నది. దానికి చక్కని నిదర్శనములు- తన పార్టీ పవర్లోంచి దిగిపోయినప్పుడు చట్టంలా విజృంభించుట, పవర్లో వున్నప్పుడు పార్లమెంటులో నిద్రించుట. ఇటువంటి భవిష్య పరిణామములను దృష్టిలో వుంచుకునే విష్ణువు కాఫీ తరువుని సృష్టించి, బ్రహ్మకి కాఫీగింజలని తీసి, వేయించి, పొడికొట్టి , డికాషను తయారుచేసే విధానాన్ని వివరించి; అందుకు అవసరమైన సామాగ్రి ఫిల్టరుతో సహా ప్రసాదించబోయి కూడా ఎవరివైనా మనోభావాలు దెబ్బతింటాయేమో, ఎందుకొచ్చిన సంతయని ఊరుకున్నాడు. ఆ విధంగా దేవకార్యంలో సహాయపడలేకపోయిన వైనం తల్చుకొని కాఫీమొక్క బాధ పడుతుంటే కలియుగంలో మానవులు తమతమ వక్రబుద్ధులచే, చిత్తచాంచల్యములచే అష్టకష్టాలు కొనితెచ్చుకుంటారుగావున విష్ణువు మేల్కొనేవరకూ వారికి ఉపశమనంతో పాటు ఉత్సాహం కూడా కలిగించమని బ్రహ్మ ఆజ్ఞాపించగా అది భూమ్మీద అవతరించింది. ఆ విధంగా కాఫీ మేకింగ్ ఇంచుమించు బ్రహ్మవిద్యగా గుర్తించబడిన కొన్ని యుగాల వరకూ అది రాకెట్ సైన్సా కాదా అనే ప్రశ్న తలెత్తలేదు. రాకెట్లు, స్పేస్ షటిల్స్ వగైరా వ్యోమనౌకల్లో భూమికి దూరంగా దీర్ఘకాలం వుండాల్సిన వ్యోమగాములు ఇన్స్టెంట్ కాఫీ తాగలేక హలో! లక్ష్మణా! ఫిల్టర్ కాఫీయో రామచంద్రా! అని మొరలు పెట్టుకోగా ఎట్టకేలకు కాఫీ చెయ్యడం రాకెట్ సైన్సుగా కూడా మారింది. బ్రహ్మవిద్య అయిన దానికి రాకెట్ సైన్సు కావడం ఎంతసేపు? భూమ్మీద అన్నమో రామచంద్రా అన్నవాణ్ని నానా తంటాలు పెట్టే విధి శూన్యంలో కూచుని కాఫీ అడిగినవాడికి వెంటనే కాఫీ అందించేస్తుంది. అదీ విష్ణుమాయే కానీ ఒకరికి లక్ష్మీ దేవి రికమెండేషన్ లేదు, ఇంకొకరికి వుంది. ఎనీవేస్, రాకెట్ సైన్సువాడి  కాఫీ కలపడం ఈ మధ్యే మొదలైంది. శూన్యంలో కాఫీని గ్లాసుల్లో అటూఇటూ పోసి నురుగులు తెప్పించి, ఇంట్లోనూ, ఉడిపి హోటల్లోనూ తాగినట్టు తాగడం అసాధ్యం కదా! అందువల్ల సౌత్-ఈస్ట్ ఏషియన్ దేశాల్లో, ముఖ్యంగా సింగపూర్, మలేషియాల్లో ప్లాస్టిక్ సంచీల్లో పోసుకుని స్ట్రాతో తాగినట్టు తాగాలి. అఫ్ కోర్స్ , ప్లాస్టిక్ సంచీ, స్ట్రాల కన్నా హుందా అయిన, కాఫీ గౌరవానికి తగిన ఎరేంజ్-మెంట్ వుంటుంది. బ్రాండెడ్ కాఫీ ఔట్-లెట్స్ వదిలేసి స్ట్రీట్ సైడ్ స్టాల్స్ లో కాఫీకి తయారైన కాఫీ సదాచారపరాయణులకి సింగపూర్, మలేషియాల్లో తగిలే కల్చర్ షాక్ ఎలా వుంటుందంటే బొందితో స్వర్గానికెళ్తూ కాఫీ బ్రేక్ కోసం నరకం దగ్గర ఆగిన ధర్మరాజుకి తగిలిన షాక్ లా వుంటుంది. అసలే ఆ స్టాల్స్ లో కాఫీ వేడి వేడి క్రూడాయిల్లో పది చెంచాల పంచదారేసుకు తాగినట్టుంటుంది. దానికి తోడు condensed & sweetend milk, అదీ మూతి కాలిపోయే వేడితో ప్లాస్టిక్ సంచీలో స్ట్రా తో తాగడం. ఆర్కే నారాయణో, రాజాజీయో, జర్మన్ స్టేట్స్-మన్ బిస్మార్కో (or) any serious coffee lover ఈ హాట్ క్రూడాయిల్ ఇన్ పాలిథిన్ బాగ్ విత్ స్ట్రా కాన్సెప్ట్ చూసినా, విన్నా ఎలా రియాక్టయ్యేవారో కదా! ఆ విషయం పద్ధెనిమిదో కప్పు తాగుతూ …. స’శేషః’

సత్యం=కాఫీ; మతం=ఫిల్టర్ అడుగున మడ్డి


పూర్వం ఎప్పుడో ఎక్కడో ఒక వూరుండేదిట. ఆ వూరిచుట్టూ చాలా ఎత్తైన పెద్ద ప్రహరీ గోడ. అవతల ఏముందో అందరికీ విపరీతమైన క్యూరియాసిటీ. అయితే ఎవరూ దాటి వెళ్ళరు, అది పడగొట్టనూలేరు. దాంతో గోడవతల వున్నదానిపై ఊరంతా ఊహాగానాలే కానీ, ఖచ్చితంగా ఏఁవుందో తెలిసినవాడు ఒక్కడూ లేడు. చాలా ఏళ్ళకి ఓ ముగ్గురు సాహసించి, అసాధ్యం అనుకున్న ప్రహరీ గోడ ఎక్కేసారు. అవతల ఏం అద్భుతం కనిపించిందో ఏమో ఒకడు అవతలి పక్కకి దూకేసాడు. ఇంకొకడు గోడ మీదే అలా కూచుని చూస్తూండిపోయాడు. మూడోవాడు తను చూసింది అందరికీ చెప్పడానికి గోడ దిగి వూళ్ళోకి వచ్చేశాడు. జనం బ్రహ్మరధం పట్టారు వాడికి. వాడు చెప్పిందంతా విని కధలుగా చెప్పుకునే వాళ్ళు. నూటికి తొంభైతొమ్మిది పాయింట్ తొమ్మిది తొమ్మిది తొమ్మిది మందికి ఆ కధలు ఎంతవరకు నిజమో నిర్ధారించుకునే ధ్యాస వుండేదికాదు. గో.ది.వీ (గోడ దిగిన వీరుడు) చెప్పిన విషయాలు చిలవలు పలవలు చేసి చెప్పుకుంటూ వుండేవారు. వాటి మీద మీమాంసలు, భాష్యాలు, కావ్యాలు, సిద్ధాంతాలు, ఫర్ & అగైన్స్ట్ టీవీ చర్చలు … రోజువారీ పన్లు ఐపోయాక గ్రామస్తులకి ఇవే కాలక్షేపం. అంతలో ఇంకో కొత్త గో.ది.వీ తయారయ్యాడు. మొదటి గో.ది.వీ చెప్పిందంతా తప్పన్చెప్పి పాత సారానే కొత్తసీసాలో పోసాడు. ఇంక అక్కణ్ణుంచీ ఫాక్షన్స్,వర్గాలు, రాజకీయాలు మొదలయ్యాయి. .. కొత్తగా ఒకడు గోడ ఎక్కి చూసి వెనక్కి వచ్చినప్పుడల్లా ఒక కొత్త వర్గం తయారయ్యేది. అలా వూరి జనాభా అంతా గోడవతలి మిస్టరీ ఆధారంగా వర్గాలుగా విడిపోయి కొట్టుకు చస్తూ వుండేవారు. వూరిపై ఆధిపత్యం కోసం పోటీపడే వూరిపెద్దలకి గోడవతలి మిస్టరీ కొత్త అస్త్రంగా మారి వోట్ బాంకులు సృష్టించింది. అధికార సంపాదనకి దాన్నో షార్ట్-కట్ గా వాడేసుకుంటున్నారు వూరి పెద్దలు. కొందరికి చిరాకుపుట్టి గోడ పడగొట్టేస్తే సగం దరిద్రం తీరుతుందని ఆ ప్రయత్నం చేశారు. వాళ్ళని అన్ని వర్గాల వాళ్ళూ సమానంగా ద్వేషించి, వెలివేసి బతుకు దుర్భరం చేసేశారు. కొందర్ని చంపేశారు కూడా. ఇంతలో గోడ పడగొట్టమనేవాళ్ళలో కూడా మూర్ఖ వితండవాదులు బయలుదేరి, సొంత ఫాక్షన్ ఒకటి తయారు చేసుకుని అసలు గోడవతల ఏమీ లేదంటూ జనంలో వున్న కన్ఫ్యూజన్ ఇంకా పెంచడం మొదలెట్టారు. ఈ రకంగా గోడవతల మిస్టరీని తెలుసుకునే ప్రయత్నం చివరికి ఏనుగుని “చూడ్డానికి” వెళ్ళిన గుడ్డివాళ్ళ కధలా తయారయ్యింది. ఆ వూళ్ళోనే ఓ మేధావి ఈ గందరగోళం అంతా చూసి – గుడ్డిగా నమ్మబడిన, అంతే గుడ్డిగా ఖండించబడినది ఏదైనా సరే అది ప్రజల పాలిటి మత్తు మందే అనే నిశ్చయానికి వచ్చాడు. గోడలేదు, గోడవతల కూడా ఏమీ లేదులాంటి వితండవాదం జోలిపోకుండాముందు తను గట్టిగా ట్రై చేసి, గోడెక్కిమిస్టరీని చూసి అది నిజమే అని ధ్రువపరుచుకున్నాడు. గోడ దిగి వూళ్ళోకి వస్తుంటే జనం యధావిధిగా ఏం చూసావంటూ ఆరాలు మొదలెట్టారు. అందరూ సాయంత్రం రచ్చబండదగ్గరికి రండి అందరికీ ఒకసారే చెప్తాను అన్నాడు మనవాడు. ప్రజలంతా రచ్చబండ చేరుకునేసరికి మనవాడు పక్కన ఓ కాఫీ గ్రైండర్, స్టవ్, ఫిల్టర్ పెట్టుకుని ఉన్నాడు. ఓ పక్క కాఫీ గింజలు వేగుతున్నాయి. ఇంకోపక్క వేగిన గింజల్ని గ్రైండర్లో దంచుతున్నాడు. మరోపక్క పెద్దగిన్నెలో కరిగిన బంగారంలా కాఫీ సన్నటి సెగపై వేడెక్కుతూ వుంది. వేగుతున్న గింజల నుంచీ, గ్రైండర్ నుంచీ అద్భుతమైన అరోమా వ్యాపిస్తోంది. అప్పుడే కలుపుకున్న కాఫీ కప్పులోకి వంపుకుంటున్నాడు హీరో. అక్కడ జరుగుతున్న కాఫీయుక్త కవోష్ణ క్షీర పానీయ విరచనా ప్రక్రియ చూస్తూ జనం వచ్చిన పని మర్చిపోయారు. వరద గోదారి కెరటాలపైనుండే నురుగుని, ఆ రంగుని తలిపిస్తూ పరిమళాలు వెదజల్లుతున్న ఆ కాఫీని చూసిన జనుల జ్ఞానేంద్రియాలు పరవశించాయి. బుర్రల్లో ఎన్నాళ్ళుగానో మేట వేసుకుపోయిన మట్టి, బురద సడెన్ గా క్లియరైపోయిన రిలీఫ్. ఏదో తెలీని మత్తులోంచి తేరుకున్నఫీల్. అమృతభాండం సంగతి మర్చిపోయి జగన్మోహినిని చూస్తూ ఒళ్ళు మర్చిపోయిన రాక్షసుల్లా జనులు లొట్టలెయ్యసాగారు. లొట్టల స్టాండింగ్ ఒవేషన్ తో ఆ ప్రదేశం పులకించింది. అయినా మన హీరో ఎవరికీ కాఫీ ఆఫర్ చెయ్యడు, మాట్లాడడు. వరసగా నాలుగు కప్పులు హాయిగా, ఆనందంగా నురుగులు, పొగలు కక్కుతున్న గోల్డెన్ బ్రౌన్ కలర్ ఫిల్టర్ కాఫీ తాగుతూ వుండిపోయాడు. కాసేపటికి తేరుకున్న జనం తమకి ఆ రుచి చూపిస్తాడని ఆశపడ్డారు. హీరో మాత్రం ఐదో కప్పు కలుపుకుని నెమ్మదిగా సిప్ చేస్తూ కళ్ళు మూసుకుని అలౌకికానందంలో మునిగాడు. జనానికి తిక్క రేగిపోయింది.  “ఒరేయ్! విషయమైనా చెప్పు, కాఫీయైనా ఇవ్వ”ని ఘోషించారు. హీరో అన్నాడు – “నేను కాఫీ తాగుతుంటే మీరంతా తెగ లొట్టలేసారుగదా, తాగినంత తృప్తి ఫీలైయ్యుండాలే!,” అన్నాడు. “నీ మొహం, కాఫీ తాగింది నువ్వైతే, మాకెలా తృప్తి కలుగుతుంది, మా మత్తెలా వదులుతుంది,” ముక్తకంఠంతో ఘోషించారు ప్రజలు. “కదా! ఎవరి కాఫీవాళ్ళు తాగితేనేగానీ మత్తుపోదు,మజా రాదు,” అన్నాడు కొత్త గో.ది.వీ. “ఇందులో నువ్వు కొత్తగా చెప్పేదేముంది? మా టైము వేస్ట్ చేస్తున్నావ్. కాఫీ చుక్క ఎలాగూ ఇవ్వలేదు. కనీసం గోడవతల మిస్టరీ గురించైనా చెప్పు,” మళ్ళీ లక్ష గళార్చన. “చెప్పడానికి ఒకటే ముక్క. బైటున్న మిస్టరీ, ఈ ఫిల్టర్ కాఫీకి ఇంచుమించు సరిసాటి,” అన్నాడు లేటెస్ట్ గో.ది.వీ. వాడు మాట పూర్తి చెయ్యకముందే జనానికి జ్ఞానోదయం అయిపొయింది. అప్పటినుంచీ ప్రతిఒక్కడు సిన్సియర్ గా గోడ ఎక్కి చూసి మిస్టరీ అర్ధం చేసుకునే ప్రయత్నంలో పడ్డారు. ఓపికలేనివాళ్ళు నోర్మూసుకుని కూచున్నారు. మొత్తం అందరూ కూడా రోజువారీ పనులకి దానితో ముడి పెట్టడం మానేశారు. అనవసరపు చర్చలు, ఎడతెగని రాద్ధాంతాలు ఆగిపోయాయి. రాజకీయ నాయకులకి కొంచెం నిజం పని నిజంగా చెయ్యాల్సిన అవసరం ఏర్పడిపోయింది. అదీ కాఫీ మహత్వం, కాఫీ శాస్త్రీయంగా తాగినవాడి మహాత్మ్యం.
నీతి:
కాఫీ ఆనందం అనేది ఎవరికివారే అనుభవించాల్సిన విషయం అని అనుభవపూర్వకంగా తెలిసిన వూరివాళ్ళు గోడవతల మిస్టరీ కల్పించిన మత్తు వదిలించుకోగలిగారు. అదే కాఫీత్వ తత్త్వం. అలాగే మతంయొక్క పరమార్ధం ఏదో దాని మీదే దృష్టి పెడితే ప్రజలు మతం and/or మతరాహిత్యం కల్పించే మత్తులు కూడా వదిలించుకోగలరు. At the least, మత్తులో వున్నామనే విషయం గ్రహించగలరు.

(మతం అనే పదం ఆర్గనైజ్డ్ రెలిజియన్ అనే అర్ధంలోనే వాడడం జరిగింది)

So, let us now understand కాఫీత్వ

కప్పులో వున్న వేడి వేడి కాఫీ = సత్య సాక్షాత్కారం

కాఫీని ఆస్వాదించడంలో కప్పు, గ్లాసు, చుట్టూ వున్నఎట్మాస్ఫియరూ అన్నీ అవసరం అనుకుంటే అది సగుణోపాసన(కి ఇంచుమించు సరిసాటి)

ఇతర విషయాలతో సంబంధం లేకుండా జస్ట్ కాఫీ మీదే దృష్టంతా వుంటే అది నిర్గుణోపాసన (well, నిర్గుణోపాసనకి ఇంచుమించు సరిసాటి)

వివిధ బ్రాండ్ల కాఫీ పొడి = గ్రాంధిక జ్ఞానం, అనుభవ జ్ఞానం, ఆత్మ పరిశీలన, ఎట్సెట్రా

ఫిల్టర్, కాఫీ ప్రెస్,కాఫీ మెషీన్ = సాధనా పద్ధతులు

పాక హోటలు, కాఫీ బార్, స్టార్ బక్స్, కాఫీ డే, ఎట్సెట్రా = వివిధ ప్రార్ధనా స్థలములు

మిగిలిపోయిన కాఫీమడ్డి (గులాబీ మొక్కలకి, అంట్లకి తప్ప దేనికీ పనికిరాదు) = సత్యసాధనలో ఎదురైన వ్యక్తిగత అనుభవాలు (ఇతరులని ఇన్-స్పైర్ చేయడం వరకే వీటి ఉపయోగం, అంతేతప్ప అందర్నీ ఒక మూసలో పోసి వాళ్ళ నెత్తిన అవే రుద్దితే వాళ్ళ ఆలోచనాశక్తిని నిరోధిస్తాయి)

మనిషి తన జీవితానికి అర్ధం కల్పించుకునే ప్రాసెస్ లో భాగం కాఫీ త్రాగడం, పరమార్ధం తెలుసుకునే ప్రయత్నంలో కరదీపిక కాఫీకప్పు, జీవిత పరమార్ధం తెలుసుకోవాలనే ఆసక్తికి మూలం కాఫీ కలిగించే చైతన్యం. ఇంత ప్రాధాన్యమున్నా కూడా కాఫీ ఇష్టం కదా అని డికాషన్ తీసాక మిగిలే కాఫీమడ్డి మనుషులు దాచుకోరు. గులాబీ మొక్కలకి వేస్తారు, లేదా అంట్లు తోమడానికి వాడతారు. కాదూ? దీనర్ధం కప్పులోకి వచ్చిన వేడి వేడి కాఫీకి ఫిల్టర్ అడుగున మిగిలిపోయిన మడ్డికి తేడా వుందనే కదా?

ఇంకొన్ని పాయింట్స్ –
ఎవరి బ్రాండ్ కాఫీ పొడి వాళ్ళది, ఎవరి ఫిల్టర్ వాళ్ళది, ఎవరి చికరీ పర్సంటేజి వాళ్ళది. వాటి గురించి ఎవరూ పోట్లాడుకోరు.
ఫిల్టర్ కాఫీ, బ్రూ కాఫీ, లాటే, కపుచ్చినో, మోకా, కాఫీ నీళ్ళు ఎవరికిష్టమైంది వాళ్ళు తాగుతారు.
పాక హోటల్లో, ఇంట్లో, కాఫీ డేలో, స్టార్ బక్స్ లో ఎక్కడ కావాలంటే అక్కడ తాగుతారు.
ఎక్కడ, ఎలా, ఏ రూపంలో తాగినా కాఫీ ఇచ్చే కిక్కూ తృప్తీ, ఆనందం, ఉత్సాహం మాత్రం అందరిలోనూ ఒకటే.

Likewise, హూ యామై? అనే టోటల్లీ పర్సనల్ జర్నీ చివరన సత్య దర్శనం అయ్యాక, తన అనుభవాన్ని అందరికీ పంచాలన్నసత్యాన్వేషకుడి అత్యాశకి భౌతిక రూపం ఆర్గనైజ్డ్ రెలిజియన్. నిజానికది, అంటే సత్యాన్వేషకుడి అత్యాశ, కాఫీ డికాక్షన్ తీసాక మిగిలే మడ్డిలాంటిది. అలాని దాన్ని తీసిపారేసినట్టు కాదు. గులాబీమొక్కలకి, అంట్లు తోమడానికి కాఫీమడ్డిని వాడినట్టే ఆర్గనైజ్డ్ రెలిజియన్ని సత్యాన్వేషణకి, తెలుసుకున్న సత్యంతో వ్యక్తిగత జీవితాన్ని రిఫైన్ చేసుకోడానికీ వాడుకోవాలి. అంతే ఇంకొకడి నెత్తి మీదెక్కి మొత్తడానికి కాదు.

మనిషిలో మోరల్ స్ట్రెంగ్త్ పెంచడం, మనసులో, జీవితంలో స్వచ్ఛ భారత్ నిర్వహించటం, సత్యశోధన, సత్యసాధన – ఇవే దాని మెయిన్ ఫంక్షన్స్. ఇవిలేకుండా ఏం చేసినా అది పిడకల వేటే. దేవుడికి, in other words సత్యానికి, పిడకలవేటకి ఏ సంబంధమూ వుండదు. పిడకల వేటకి రూపాంతరాలే తీవ్రవాదం, మతకలహాలు, గడ్డాలు, కృపాణాలు, కన్వర్షన్లు, వోట్ బ్యాంకు పాలిటిక్సు,  …. చెత్తాచెదారం, మన్ను మశానం, ఎట్సెట్రా, ఎట్సెట్రా.

Enjoy this sixteenth cup of Kaafeetva with this Jiddu Krishnamurthy’s take on organized religion   –

God and the Devil were walking along when they looked down and saw someone had found a piece of the truth. “There” said God “Trouble for you. He’s found a piece of the truth”.

“Not at all” said the Devil. “I’ll let him organize it”.  

ఇతి శ్రీ షోడశ కప్పు కాఫీత్వం సంపూర్ణమ్

Bye4now_/\_ 🙂

స’శేషం’

ఒకదాంట్లో మనిషి దేవుణ్ణి ఇరికిస్తే రెండోదాంట్లో మనిషిని మనిషే ఇరికిస్తాడు


కాఫీత్వం, కాఫీత్వజ్ఞానం వగైరా వగైరా పదాలు కాయిన్ చేసేసి ఏదో నోటికొచ్చిన వాగుడేనా ఇందులో ఏమైనా సబ్-స్టెన్స్ ఉందా? కాఫీత్వ అంటే ఇన్స్టెంట్-కాఫీయా, గౌర్మెట్ కాఫీయా అనే డౌటు పద్నాలుగు కప్పులు కలిపాక ఇప్పటికొచ్చింది నాకు. అది తీరక బుర్ర గోక్కుంటుంటే “పానశాల” గుర్తొచ్చింది. మనం ఒమర్ ఖయాం అంతటి వాళ్ళం కాకపోవచ్చుకానీ ఆయనకీ, మనకీ – తాగే పదార్ధం వేరే అయినా- తాగడం అనే కామన్ ఫాక్టర్ ఉంది కదా, అందుకే అది గుర్తొచ్చి వుంటుంది. “పానశాల” హీరో ఒమర్ ఖయాం మధుపాత్రని, సాకీని పట్టుకు పాకులాడినా గబ్బర్ సింగ్ తిక్కలో వున్న లెక్కలాగా ఆ పాకులాటలో జగత్తత్త్వంపట్ల ఫ్రస్ట్రేషన్, దాన్ని అర్ధంచేసుకోవడానికి మంచి ఫిలాసఫీ, ఏమర్ధమయినా, ఎంత అర్ధమైనా మనిషి మార్చగలిగింది శూన్యం అన్నదానికి సూచనగా సాకీ, మధుపాత్రల సాంగత్యంలో అన్నీ మరిపించే మత్తులో జీవితం గడిపేయమనడం – ఇవన్నీ వుంటాయి. మరి కాఫీత్వలో ఏముంది? ఏవుందో నాకైతే తెలీలేదు కానీ ఫాలోయింగ్ థాట్స్ మాత్రం వచ్చాయి.

“Philosophers have variously interpreted the world. The point however, is to change it,” అన్న మార్క్స్ తత్వానికి విరుద్ధంగా అనిపించే ఒమర్ ఖయాంకి మతం విషయంలో మార్క్స్ తో ఒక విధమైన ఏకాభిప్రాయం ఉన్నట్టుంది. “మతం మనిషి పాలిటి మత్తు మందు’” అని మార్క్స్ అంటే “మత్తుని మించిన మతం లేదు,” అన్నట్టు వుంటాయి ఖయాం గారి రుబాయతులు. ఒకరికి మతం అంటే మత్తు మరొకరికి మత్తే మతం. అహహా! అఫ్కోర్స్, ఆ మత్తులోనే ఎన్నెన్నో నిజాలు వెల్లడించేశాడనుకోండి! ఈయన మతం, విశ్వాసం ఏమిటనే విషయంలో సాహితీవేత్తల మధ్య చర్చలు, బేధాభిప్రాయాలున్నాయి. అవెలాగూ తేలేవి కావు. (అవెందుకు తేలవో ఇప్పుడిప్పుడే అర్ధం అవుతోంది. భారతం మీద, ద్రౌపది మీద వచ్చిన బ్రతుకుతెరువు రచనల గురించి ఇంత విన్నాక అర్ధంకాక ఏమౌతుంది?) సరే, ఒమర్ ఖయాం చెప్పే  నిజాలు ఏమిటో తెల్సుకోవాలంటే కవికోకిల దువ్వూరి రామిరెడ్డి గారి “పానశాల” చదవాల్సిందే. అవి నిజం అనిపించకపోయినా ఏం పర్వాలేదు. మంచి కాఫీ లాంటి కవిత్వం చదివిన తృప్తి గారంటీ.

Taste a few drops of that poetic coffee –

అంతములేని యీభువనమంత పురాతనపాంథశాల; విశ్రాంతి గృహంబు; నందు నిరుసంజలు రంగుల వాకిళుల్‌; ధరా

క్రాంతులు పాదుషాలు బహరామ్‌ జమిషీడులు వేనవేలుగాఁ; గొంత సుఖించి పోయిరెటకో పెఱవారికిఁ జోటొసంగుచున్‌.       

అంబరం బొక చిత్రగీతంబు; రవియు దీపపు శెమ్మె, లోకంబు తెరపటంబు;

నీడబొమ్మలు మనుజులు; నిఖిలమునకుఁగాలచక్రంబు నిర్ణేత; గతి యనాది.    

ఆదిమధ్యాంత రహితమై యలరుచుండు, కాలయవనిక భేదింపఁ గలమె మనము?

ఇటకు నెందుండివచ్చె నింకెటకుఁ బోవు; ప్రాణి యను ప్రశ్న కెవ్వాఁడు బదులు సెప్పు?

ఇవన్నీ నిజాలా కావా?

ఇక్కడో అప్రస్తుత ప్రసంగం – మత్తుకి కాఫీకి పడదు కదా, మరి కాఫీత్వలో ఈ ‘మత్తు’ మనుషుల ప్రస్తావన ఎందుకు అనే ప్రశ్న రావాలి ఎవరికైనా. రాకపోతే కాస్త కాఫీ తాగి మత్తు వదిలించుకోవాలి. మతంవల్ల వచ్చిన మత్తు కానీ, మతాతీతమైన సైద్ధాంతిక మత్తు కానీ, సీసాల్లోంచి బుర్రలోకి డైరెక్టుగా ప్రవహించే మత్తుకానీ ఓ కప్పుతో కాఫీత్వ శుద్ధి చేసుకుంటే తప్పకుండా దిగిపోతుంది. (శుద్ధి అంటే హాయిగా, ఆనందంగా, మంచి పుస్తకమో, సినిమాయో, ప్రకృతినో ఎంజాయ్ చేస్తూ కాఫీ – అదీ ఫిల్టర్ కాఫీ – తాగడం.) మత్తు అనేది అనేక విధాలుగా వస్తుంది. ఆ విధాలలో మతం, సిద్ధాంతం, సీసా ప్రధానమైనవి. మళ్ళీ సీసామత్తు వల్ల లాభం ఎక్కువ, నష్టం తక్కువ 😉 .తాగిన వ్యక్తికి, మహా అయితే ఓ కుటుంబానికి హాని, అంతే. తక్కినదంతా లాభమే. గవర్నమెంట్ కి రెవెన్యూ, తద్వారా పాపులిస్ట్ పధకాల అమలు, అభివృద్ధి పధకాలు, ప్రాజెక్టులు, రాష్ట్రాలు సింగపూర్లు అయిపోవడాలు… ఇలా. అప్పుడప్పుడు గాంధీ, ఎన్టీఆర్ లాంటి “అభివృద్ధి నిరోధక” శక్తులు అడ్డుపడినా తట్టుకుని సీసా మత్తు విజయయాత్ర అప్రతిహతంగా సాగిపోతూవుంటుంది. “పదండి ముందుకు, పదండి తోసుకు ..” అంటూ మహాకవులు సీసాల్లో విప్లవజ్యోతులు వెలిగించినా, మనసుగతి ఇంతే అంటూ మన’సుకవులు’ బాధలు బాటిల్లో నింపేసినా అది సీసామత్తు ప్రభావమే. What an irony! అననుకోవడానికి లేదు. దానివల్ల మనకి జరిగేది మంచా, చెడా తేల్చుకోలేనంత శక్తిమంతమైనది సీసామత్తు. గుడ్ న్యూస్ ఏంటంటే విప్లవజ్వాలలు, మనసుకవిత్వాలూ కాఫీనుంచి కూడా ప్రవహిస్తాయి. అది నిరూపించడానికే ఆర్కే నారాయణ్, ఇమ్మాన్యుయెల్ కాంట్, నెపోలియన్ బోనపార్టే, అబ్రహాం లింకన్, రాజగోపాలాచారి, బీథోవెన్, బాక్ …………………. లాంటి మహామహులు ఆవిర్భవించారు. సీసా వదిలి కాఫీకప్పు పట్టుకోవడంవల్ల క్రియేటివిటీ, చురుకుదనం, రివల్యూషనరీ స్పిరిటూ యధాతధంగా ఉండడమే కాదు, పెరుగుతాయి. దానికి తోడు హెల్త్ ప్రాబ్లమ్స్ ఆల్మోస్ట్ నిల్. ఈ విధంగా కాఫీత్వంవల్ల చాలా లాభాలున్నాయ్. మద్యనిషేధంతోపాటు రోజుకి పదికప్పుల ఉచిత కాఫీ పధకం పెడితే చాలామంది జనం త్వరలోనే కాఫీకి స్విచ్ ఐపోతారు. కొన్నాళ్ళకి ఉచితపధకం ఎత్తేసినా ఫర్వాలేనంత అలవాటు పడిపోయేలా కాఫీయే చూసుకుంటుంది. సీసామత్తు బారినుంచి తప్పించుకున్నవాడికి మతంమత్తు, సిద్ధాంతాలమత్తు అనే మరో రెండు మత్తులు ఎదురౌతాయి. ఈ రెండూ దాదాపు ఒకలాంటివే. ఒకదాంట్లో మనిషి దేవుణ్ణి ఇరికిస్తాడు, రెండో దాంట్లో మనిషిని మనిషే ఇరికిస్తాడు. అందువల్ల వాటి మధ్య బేధం అదేదో బ్రాండు ఇన్స్టెంట్ కాఫీకి, అసలుసిసలు ఫిల్టర్ కాఫీకి ఉన్నంత మాత్రమే. వాటి గురించి పదహారో కప్పులో.

ప్రస్తుతానికి ఆఫీస్ టైమయిపోయినందున, ఇంటికిపోయి అన్నం తినడం నుంచి అంట్లు తోమడం వరకూ (అతి ముఖ్యమైన కాఫీ ఫిల్టర్ తో సహా) వున్న ఆధునిక గృహస్థా’శ్రమ’ బాధ్యతలు స్వీకరించాల్సిన సమయం ఆసన్నమైనందున పదిహేనో కప్పు కాఫీ అడుక్కొచ్చేసింది. బై4నౌ _/\_ 🙂

స’శేషం’

అత్తాకోడళ్ళ నుంచీ అల్-కైదా వరకూ …13వ కప్పుకాఫీ


ఒరులేయవి యొనరించిన

నరవర! అప్రియము తన మనంబున కగుఁదా

నొరులకు నది సేయకునికి

పరాయణము పరమ ధర్మపథములకెల్లన్

(ఇతరులు మనపట్ల ఏ పని చేస్తే మనకిష్టం వుండదో ఆ పని ఇతరులకు చేయకపోవడం ఉత్తమ ధర్మం). ఈ పద్యం మహాభారతంలోదని మనకి తెలియకపోయినా పరవాలేదు కానీ పద్యం అర్ధం తెలిసి ఆచరిస్తే (అందరున్నున్నూ) ఇపుడు ప్రపంచంలో అత్తాకోడళ్ళ నుంచీ అల్-కైదా వరకూ వున్న చెత్త సమస్యలుండేవే కావు. ఇంజినీరింగ్, టెక్నాలజీ, మానేజ్-మెంట్ విషయాల్లో ఎలాంటి ప్రాబ్లం వచ్చినా ముందు చేసేది రూట్-కాజ్ ఎనాలిసిస్. మానవజాతి సమస్యలకి రూట్-కాజ్ ఎనాలిసిస్ చేస్తే పై నీతి పాటించడం ఎంత ముఖ్యమో తెలుస్తుంది, బట్, ఊహూ! అరిగిపోయిన రికార్డులా నీతులు చెప్తూ కూచుంటే అది కాఫీత్వం అనిపించుకోదు. నీతిని ఎవరూ ఎందుకు పాటించడంలేదో కూడా ఆలోచించాలి. కాస్త కాఫీ తాగి ఆలోచించడం సరైన ఆలోచనలకి దారి తీస్తుంది. ఆ ఆలోచనల్లో ప్రజాస్వామిక పద్ధతి వుంటుంది. ఆ ప్రాసెస్ వల్ల నీతులు పాటించడం ఎంత కష్టమో బాగా అర్ధం అవుతుంది. ఫత్వాలు, పరువు హత్యల అవసరం లేకుండా కొంచెం మంచి పరిష్కారాలు దొరుకుతాయి. కాఫీత్వ సిద్ధాంతంలో ఏ పనైనా చెయ్యడం ఎంత కష్టమో తెలిసాకే దానికి సంబంధించిన నీతులు, ధర్మపన్నాలు తయారవ్వాలి. మనిషి మొయ్యగలిగిన దానికన్నా ఎక్కువ బరువు నెత్తిన పడేస్తే చతికిలబడతాడు కనక బరువు మోసే ట్రైనింగ్ ఇచ్చి మెంటల్ గా, ఫిజికల్ గా ప్రిపేర్ చేసి అప్పుడు బరువు నెత్తిన పెట్టాలి. ఇప్పటివరకూ సాంఘిక, నైతిక, రాజకీయ, ఆధ్యాత్మిక వ్యవహారాలన్నిట్లో మనం చేస్తున్నదంతా ఆశ లావు – పీక సన్నం వ్యవహారమే. పరిశీలించి చూస్తే కృష్ణుడి కాలం నుంచీ గాంధీ వరకూ మహాత్ములందరినీ హీరో వర్షిప్ చెయ్యడం ఎక్కువ వాళ్ళు చెప్పినవి అర్ధం చేసుకోవడం తక్కువ, ఆచరణలో పెట్టడం???. హ్మ్! the less we talk about it, the better. సరే, అది కాసేపు అలా వుంచి పై నీతిని కాంట్ ఎలా చెప్పాడో చూద్దాం. యధాశక్తిగా తనకి వీలైనంత క్లిష్టంగా తన కేటగరికల్ ఇంపరేటివ్ లో చెప్పాడు, ఇలా

“Act only according to that maxim whereby you can at the same time will that it should become a universal law without contradiction” – మహాక్లిష్టంగా ఉంది కదా. ఇలాంటిదాన్నే కవిత్వభాషలో నారికేళ పాకం అంటారు. అంటే కొబ్బరి నీళ్ళు. కొబ్బరినీళ్ళు తాగాలంటే కాఫీ తాగినంత సింపుల్ గా ఉండదు వ్యవహారం. నీళ్ళు ఎంత తియ్యగా, చల్లగా, హాయిగా ఉంటాయో దాని చుట్టూ వుండే పెంకు, పీచు అంత ఇబ్బంది పెడతాయి. ద్రాక్షాపాకం అని ఇంకో కాన్సెప్ట్ ఉంది. రచన అనేది ద్రాక్షపండు తిన్నంత సులభంగా అర్ధమైతే అది ద్రాక్షాపాకంట. ఐతే ద్రాక్షాపాకం అంటే Wine అనే అపార్ధం చేసుకునే అవకాశం, ఆ convenient-thinking అలవాటైన మహాత్ములు మస్తుగా ఉన్నందువల్ల కాఫీత్వభాషలో ఆ మాటని నిషేధించటం జరిగింది. దాని బదులు కాఫీ అనే రెండక్షరాలు వాడితే నారికేళపాకం కూడా ద్రాక్షాపాకం అంత సులభమైపోయి, ద్రాక్షాపాకపు (Wine) సైడ్-ఎఫెక్ట్స్ లేకుండా కాఫీలా హాయిగా, వెచ్చగా, ఉత్తేజపూరితంగా, ఉత్సాహభరితంగా మారిపోతుంది.

Now, కాంట్ మహాశయుడి ఫస్ట్ కేటగరికల్ ఇంపరేటివ్ ని కాఫీగా మార్చి సేవిస్తే –

బ్లాక్ కాఫీ ప్రియులకి ఇలా కాస్త నెగెటివ్ గా – “Do not impose on others what you do not wish for yourself” అనిన్నీ, సౌతిండియన్-ఫిల్టర్ కాఫీవేత్తలకి ఇలా పాజిటివ్ గా –  “Treat others how you wish to be treated” అనిన్నిన్నీ వినిపిస్తుంది.

ఇంట్లో వంటంత టైం వేస్ట్ మరోటి లేదు(ట) – ఇతి శ్రీ ద్వాదశకప్పు కాఫీత్వః


చిన్నప్పుడు ఆంధ్రప్రభలో ఓ కార్టూన్ చదివాను. ఒకడు ‘ఉల్లిపాయలో సీ విటమిన్ వుందని కనిపెట్టానోయ్ పీ.హెచ్.డీ వచ్చింది,’ అంటే రెండో కారెక్టర్, ‘ఉల్లిపాయలో సీ విటమిన్ లేదని కనిపెట్టి నేను పీ.హెచ్.డీ కొట్టానోయ్,’ అని నవ్వుకుంటూ వుంటారు. కార్టూన్ నేపధ్యం అర్ధమయ్యేంత సీన్ అప్పుడు లేదు కానీ, పీ.హెచ్.డీ లు సంపాదించడమనేది ఏ కారణంచేతో హాస్యాస్పదం అయ్యింది అని మాత్రం తెల్సింది. తరవాత రోగాల విషయంలో డాక్టర్లు, కేసుల విషయంలో కోర్టులు, ప్రజా సమస్యల విషయంలో పార్టీలు ఒకదానికొకటి పొంతనలేని థియరీలు, తీర్పులు, విధానాలు (respectively) పాటిస్తుంటే అప్పుడర్ధమైంది. అన్ని రంగాల పరిస్థితి ఇంతేనని.

ఈ మధ్య బుర్ర కంటే శరీరం ప్రధానం అని భావించే ఫిలాసఫీ ఒకటి బయలుదేరింది.  చెన్నై ఎక్స్ప్రెస్ రిలీజ్ అయినప్పుడు ఒక రివ్యూలో ఇలా రాసారు – రోహిత్ షెట్టి సినిమాకి వెళ్ళేప్పుడు బుర్ర బీరువాలో లాక్ చేసి వెళ్లాలని. అలాగే ఈ ఫిలాసఫీ లోతుల్లోకి బుర్ర బుద్ధీ అవసరంలేనివారే వెళ్ళగలరు. ఆ ఫిలాసఫీకి మూలస్తంభమైన ఒక సూత్రం –

జీవితంలో వంట చెయ్యడమంత టైం వేస్ట్ పని మరొకటి లేదు. వంట మీద సమయం వెచ్చించడం అంటే అంత మేరకి క్రియేటివిటీ కోల్పోయినట్టు. ఆ సమయంలో ఎన్నో ఉపయోగకరమైన పనులు చెయ్యవచ్చు. ఇంట్లో కిచెనూ, దాంట్లో వుండే వివిధ పరికరాలూ,.. అసలదంతా చెత్త……….

ఇలా సాగుతుంది నూతన తత్వశాస్త్రం.

ఇలాంటి థియరీని ఎంతమంది నమ్ముతారో, బలపరుస్తారో తెలీదు  కానీ (వాళ్ళకో దణ్ణం) పైన చెప్పిన ఉల్లిపాయ-సీ విటమిన్ థియరీలాగే మనం కూడా ఒక థియరీ తయారుచెయ్యచ్చు అది  –

జంక్ ఫుడ్డు తిని తీసిన సినిమాల్లోని చెత్త శాతము ఆ ఫుడ్డులోని జంక్ కి అనులోమానుపాతము (direct proportion)లో నుండును.

బావుందా థియరీ? బావుంటే ఆ ఫీల్ కి ఒక కప్పు కాఫీ తోడైతే ఇంకా బావుంటుంది. ఒకవేళ బావుండకపోతే ఆ ఫీలుక్కూడా కప్పు కాఫీయే మందు.

So, enjoy the twelfth cup of Kafeetva _/\_   🙂

kaafeetva10

అందమే ఆనందం=ఖిల్తే హై గుల్ యహాఁ=Where Eagles Dare=11th cup


అందమే ఆనందం, ఆనందమే జీవిత మకరందం .. పాడుకున్నప్పుడు, విన్నప్పుడు, అందులో ఏఎన్నార్ ఎక్స్ప్రెషన్స్ కి మురిసినప్పుడు

చల్లగా రావేలా , మెలమెల్లగ రావేల, వినీలా మేఘమాలా ... పాటలో బ్లాక్ & వైట్లో అందంగా పడే వర్షం చూసినప్పుడు

మేరె సప్నోంకి రానీ కబ్ ఆయేగీ తూ .. చూస్తూ, వింటూ ఆ సీన్లోకి వెళ్ళిపోయి రాజేష్ ఖన్నాతో జీపులోనో, షర్మిలా టాగోర్ తో టాయ్ ట్రెయిన్ లోనో ప్రయాణించేస్తున్నప్పుడు …

ఖిల్తే హై గుల్ యహా … పాడుకుంటూ శశికపూర్ తో సమానంగా రాఖీ కళ్ళల్లోకి చూస్తూ ఒళ్ళు మర్చిపోయినప్పుడూ

నవరంగ్ ధియేటర్లో Where Eagles Dare చూస్తూ రిచర్డ్ బర్టన్, క్లింట్ ఈస్ట్-వుడ్ తో కల్సి నాజీ ట్రూప్స్ ని నాశనం చేసేస్తూ పీకలోతు థ్రిల్లులో ములిగిపోయినప్పుడు

Raiders of the Lost Ark లీలామహల్లో చూసాక ఇండియానా జోన్స్ టైపు కెరీర్లో సెటిలైపోవాలని డిసైడ్ చేసుకుంటున్నప్పుడు..

(ఇవేకాదు ఇంకా చాలా వున్నాయి) … ఇవన్ని సందర్భాల్లోనూ కాఫీ గుర్తొస్తుంది,

వెంటనే వేడి వేడి కాఫీ తెల్లగా మెరిసిపోయే కప్పులో తాగాలనిపిస్తుంది.

అలా అనిపిస్తేనే పై సన్నివేశాలన్నీ నిజంగా, గాఢంగా మళ్ళీ మళ్ళీ చూడాలనిపించేలా చూసినట్టు.

కాఫీప్రియులే అలా చూడగలరు. అలా చూడగలిగిన వ్యక్తినే కాఫీత్వవాది అందురు. అతనికి కాఫీత్వ ఫిలాసఫీ తెలియకపోవచ్చు కానీ త్వరలోనే అతనికంటూ ఒక ఫిలాసఫీ, ఒక వరల్డ్ వ్యూ ఏర్పడిపోయి జీవితం కూడా అర్ధమైపోయి హాయిగా వుండగలుగుతాడు. జీవితంలో ప్రతీక్షణాన్ని – ఆ క్షణం తనకి కావలసినట్టు లేకపోయినానూ – ఎంజాయ్ చెయ్యడం ఎలాగో తెలిసినవాడై వుంటాడు.

ఇప్పుడు మీరు పదకొండో కప్పు కాఫీ(త్వ) తాగుతున్నారు.

KAAFEETVA9

ఫిలాసఫీ – ఋణమాఫీ – ఒక కాఫీ


ఫిలసాఫీ చదవని పాపము

ఋణమాఫీ చెయ్యని నేరము

ఒకకాఫీ త్రాగని దోషము

అవి కాఫీత్వము చదివిన పోవును

Note : చివరలో తధ్యము సుమతీ! యాడ్ చేసికూడా పై పద్యమును చదవవచ్చును.

kaafeetva8

కాఫీత్వంలోనె వుంది మనిషిజన్మ సార్ధకం … నైన్త్ కప్


kaafeetva7