ఆకాశంలో మర్డర్ జరిగినట్టు లేదూ? సూరీడు నెత్తురు…


పొద్దు పొడుస్తున్నప్పుడు కానీ, పొద్దు గుంకుతుంటేగానీ సూరిబాబుని చూస్తే ఆకాశంలో మర్డర్ జరిగినట్టు లేదూ? సూరీడు నెత్తురుగడ్డలా లేడూ??.. అని “రావు గోపాల్రావు” టైపు కంట్రాక్టర్లకి అనిపిస్తుంది కానీ అందరికీ అలాగే ఎందుకనిపిస్తుంది? అసలెందుకనిపించాలి?

లోకో భిన్న రుచిః

పుర్రెకో బుద్ధీ జిహ్వకో రుచీ

ఏ గూటి చిలక ఆ పలుకే పలుకుతుంది

ఏకం సత్ విప్రాః బహుదా వదంతి ….

ఇలాంటి సామెతలన్నీ నిజం చెయ్యడానికైనా ఒక్కోళ్ళకీ ఒక్కో విధంగా అనిపించాలి. అనిపిస్తుంది.

అందువల్ల —

ఒకళ్ళకి పడమట సంధ్యారాగం అనిపించొచ్చు.

సంధ్యారాగం అంటే సంగీతంలో అదొక రాగం అనుకునే నాలాంటివాళ్ళు తొలిసంధ్య వేళలో తొలిపొద్దు పొడుపులో, తెలవారే తూరుపులో వినిపించే రాగం భూపాలం, యెగిరొచ్చే కెరటం సింధూరం… అనే దాసరి రచనని హమ్ చేసుకోవచ్చు. (కెరటం ఎగిసి రాకుండా ఎగిరి రావడం ఏంటో అనే సందేహం ఒక పక్కన పీడిస్తున్నా సరే)

మరొకళ్ళకి అరిచేత్తో సూర్యోదయాన్ని ఎలా ఆపలేరో సూర్యాస్తమయాన్ని కూడా ఆపలేరు అనే అర్ధంపర్ధంలేని ఆలోచన రావచ్చు.

కందగడ్డలాంటి సూర్యారావుగారి మొహం చూస్తే పద్యాలూ అవీ రాయడం వచ్చిన వాళ్లకి కందపద్యాలు రాసెయ్యాలనిపించొచ్చు.

ఇంకొకళ్ళకి అరుణకిరణాలు, ఎర్రజెండాలు, ఇంక్విలాబులు తప్ప ఇంకేం గుర్తుకురాక పోవచ్చు. విప్లవభావాలుంటే – “బూర్జువా కత్తి గుండెల్లో దిగబడిన బడుగు సూరీడు …” టైపు కవిత్వాలు ఆ సూరీడి రక్తంలా మబ్బుల మధ్య సందుల్లోంచి ప్రవహించొచ్చు.

కొందరికి ఆకాశంలో ఒలికిన ఆవకాయ ఊట, అందులో బోర్లా పడిన జాడీ కనిపించి నోట్లో నీళ్ళూరొచ్చు.

ఎందరికైనా ఎన్నైనా అనిపించొచ్చు. ఈ రోజు సాయంత్రం ఇంటికొస్తూనే మాస్టర్ రూమ్ కిటికీలోంచి కనబడిన దృశ్యం నాచేత అదిగో 👇అలా అనిపించింది.

StarSlip

కొద్ది నిమిషాల ముందు ఆ నక్షత్రం మా ఇంటి కిటికీ పక్క నుంచి భూమి ఆవలి పక్కకి జారిపోయింది. తెలుగురక్తం కనక A while ago, a star slipped by my window towards the other side of the globe అంటూ ఆంగ్లంలో కూడా యధాశక్తి వెలగబెట్టింది.

ఇంతే సంగతులు. బై4నౌ 🙋‍

 

 

18 thoughts on “ఆకాశంలో మర్డర్ జరిగినట్టు లేదూ? సూరీడు నెత్తురు…

  1. విన్నకోట నరసింహారావు

    //”కెరటం ఎగిసి రాకుండా ఎగిరి రావడం ఏంటో …”//
    సరైన పదం ఒక్కోసారి తట్టదేమో? తట్టే వరకు ఆగే వెసులుబాటు ఉండదేమో?
    మహేషుడి వీరోచిత కార్యాలు చూపిస్తూ (as usual) తీసిన ఓ మూవీలో ఓ పాటలో “చెప్పవే చిరుగాలి, చల్లగా ఎద గిల్లి ….” అంటాడు. గిల్లే బదులు “ఎద తాకి” అనో / లేదా అటువంటిదే మరో పదమో కవిగారెందుకు ఉపయోగించలేదా అనుకుంటాను ఆ పాట వినబడినప్పుడల్లా 😦. మీరన్నట్లు లోకోభిన్నరుచిః.
    పాత “మల్లీశ్వరి” మూవీలో “మనసున మల్లెలు” పాట వ్రాస్తున్నప్పుడు ఒక చోట సరైన / తనకు నచ్చిన పదం తట్టడం లేదని, అటువంటి పదం కోసం ఆలోచిస్తూ ఆ పాట రచన పూర్తి చెయ్యడానికి రెండో మూడో నెలలు టైం తీసుకున్నారట ఆ పాట రచయిత దేవులపల్లి కృష్ణశాస్త్రి గారు – మహానుభావుడు 🙏. నిర్మాత కూడా తొందర పెట్టలేదట. ఇప్పుడో – అంతా స్పీడ్ కాలం కదా.


    https://polldaddy.com/js/rating/rating.js

    Like

    Reply
    1. Zilebi

      ఎద తాకే గాలులకే
      సదా ఖుషిన్ పొందితే రసమయంబెట్లౌ
      యెద గిల్లించుకొను గబగ
      బ దండిగ ఫిదా యవన్ జబర్దస్తీగన్ 🙂

      జిలేబి”

      https://polldaddy.com/js/rating/rating.js

      Like

      Reply
  2. విన్నకోట నరసింహారావు

    “సూర్యం” గారి ఫొటో అద్భుతంగా ఉంది. ముఖ్యంగా ఆయన మీదున్న ఆ మబ్బుతునక నాకు బాగా నచ్చింది. Well captured and in time 👏.
    మీరు చేస్తున్న ఉద్యోగం నుండి రిటైర్ అయిన తరవాత ఫొటోగ్రాఫర్‌గా మీ సమయాన్ని చక్కగా సద్వినియోగపర్చుకోవచ్చు. పాత “సాగరసంగమం” మూవీలో జయప్రద తను తీసిన ఫొటోలు ఆనాటి “ఇలస్ట్రేటెడ్ వీక్లీ ఆఫ్ ఇండియా” పత్రికకు పంపిస్తున్నానన్నట్లు మీరు కూడా మీరు తీసిన ఫొటోలు ఏదన్నా ప్రముఖ పత్రికకు పంపచ్చు (దాంతోబాటు మీ బ్లాగులో కూడా తప్పక పెట్టండి)🖒.


    https://polldaddy.com/js/rating/rating.js

    Liked by 1 person

    Reply
    1. YVR's అం'తరంగం' Post author

      నా ఫోటో మీకు సాగరసంగమం సినిమాని, అందులో జయప్రదని గుర్తుకు తెప్పించినందుకు ఆ ఫోటోపైనా, సూరిబాబుపైనా యిష్టం ఇంకా పెరిగిపోయిందండీ. అంత అరుదైన దృశ్యకావ్యం కదా!

      Like

      Reply
  3. విన్నకోట నరసింహారావు

    బ్లాగులోకం అంత ఔత్సాహకరంగా లేదు ఈమధ్య. ‘కష్టేఫలి’ శర్మ గారు బ్లాగుల నుండి దాదాపు రిటైర్ అయ్యారా అనే అనుమానం కలుగుతోంది. Rather he has been hounded out – కొంతమంది పుణ్యమా అని – అనిపిస్తుంది కూడా. శ్యామలీయం గారూ బాగా తగ్గించేశారు. లక్కాకుల రాజారావు మాస్టారు, బండి రావు గారు కూడా అంత active గా లేరు. ‘హరేఫలే’ ఫణిబాబు గారు మరీ నల్లపూసైపోయారు. దురదృష్టకరం. అఫ్‌కోర్స్ “జిలేబి” గారి అలుపెరుగని కంద పద్య రచనా వ్యాసంగం మాత్రం వీరోచితంగా నడుస్తోంది ☺.

    ఇక నేనాస్వాదించే బ్లాగుల్లో ఒకటైన మీ బ్లాగు. ఈ నేపధ్యంలో మీ ఈ లేటెస్ట్ టపా రావడం ఆనందం 👌.

    పై ఫొటోలో కనిపిస్తున్న భవంతుల ఆకృతిని బట్టి చూస్తే మీరు ప్రవాసులనిపిస్తోంది 🤔. సర్లెండి, “ఎక్కడ ఉన్నా ఏమైనా ….” అన్నట్లు ఎక్కడుంటున్నా బ్లాగ్ టపాలు తరచూ వ్రాస్తుండండి 👍.

    Like

    Reply
    1. Zilebi

      ఔత్సాహకరము గా లే!
      వాత్సల్యము బోవ, బ్లాగు వదిలిరి విదురుల్
      కత్సవరముపై బరువున్
      తాత్సారము జేయక భళి తప్పించెరకో !

      జిలేబి

      https://polldaddy.com/js/rating/rating.js

      Like

      Reply
    2. YVR's అం'తరంగం' Post author

      వీయెన్నార్ సార్! అవునండి మీరన్నది నిజం. ఇంకేమనాలో తెలియడం లేదు. నా బ్లాగు మీకు నచ్చడం భలే సంతోషాన్నిచ్చింది.

      Like

      Reply
      1. Zilebi

        నే బతుకులో ప్రవాసుడ!
        నా బాలాగున స్వదేశి నరుడ నరసరా
        యా! భారతి దయ రాసితి
        నే పట్టుగనుచు టపాల నెమ్మది గానన్ 🙂

        జిలేబి

        https://polldaddy.com/js/rating/rating.js

        Like

        Reply
  4. Zilebi

    సూరీడమ్మా సూరీ
    డూ! రయ్య న కనుమరుగయె రుధిరపు రంగున్
    పారించి జిలేబీయం
    బై!రా రండీ గనండి బై బై 4 నౌ 🙂
    చీర్స్
    జిలేబి


    https://polldaddy.com/js/rating/rating.js

    Like

    Reply
    1. YVR's అం'తరంగం' Post author

      జిలేబిగారూ, మూడు పద్యాల బోనస్‌కి అనేకానేకనెనర్లు. ఇంతకీ 4 అంకె గురువా? లఘువా?

      Like

      Reply
  5. lalithats

    I hope you don’t mind – just tried to reword:
    కొద్ది నిమిషాల ముందు ఆ (నక్షత్రం=మేరుజ్యోతి) మా ఇంటి కిటికీ పక్క నుంచి భూమి ఆవలి పక్కకి జారిపోయింది. A while ago, (a star=the Aurora) slipped by my window towards the other side of the globe

    Like

    Reply

Hi, _/\_ :-) Thank you for coming this far in the post ;-) I do appreciate people who stimulate my creativity & make me think on a deeper level. Your rating this post helps. _/\\_ :-)

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s